逐漸適應

入伙後第三日遇著打風(8月6日), 我同老公可以留響屋企陪小肥貓. 佢冇咁驚啦, 第一餐仲好有胃口添, 我放低個兜轉頭佢已食得乾乾淨淨.

食飽無耐佢匿入梳化底, 不過當我地趴低望佢叫佢, 佢又會應我地, 然後捐返出黎俾我地摸. 每次我趴底望佢, 腦裏面都會諗起"藍寶石王子", 梳化底好暗, 小肥貓毛色又深, 好難睇得見佢, 但佢對大眼睛就好似黑暗中會發光既寶石咁, 搵到兩點光, 就能夠知道佢既位置甚至姿勢呢~

果日佢多左四圍行, 又跳上窗台及梳化休息. 佢既身體語言話俾我地知佢放鬆左, 頭兩日佢行路好慢好謹慎, 坐姿亦一本正經, 第三日就自然好多, 行得自在d, 坐得"呢啡"d, 仲開始周圍攤!

果日無乜點影相, 得呢張稍為清楚, 佢個表情好似仍有少少驚咁:

「風假」俾左我地一日休息, 係好好時機讓二人一貓互相親近, 了解多d同建立親密d既關係, 我同老公見小肥貓慢慢適應都好開心, 不過令我地困擾既事情卻開始出現......

入伙的第二天

小肥貓搬黎既第二日依然好驚青, 自從前一晚匿入梳化底, 到第二朝我同老公出門口返工佢都冇露面, 我地將貓糧放響梳化邊, 諗住晏d佢實會出黎食, 點知到中午我返屋企, d糧依然冇郁過, 廁所亦係乾乾淨淨!

我隔一陣就趴低望入去叫下佢, 次次佢都會望返我, 叫好多次佢先肯捐出少少俾我摸下, 我馬上俾糧佢食, 佢實在餓得太耐啦, 食食下不知不覺行左出黎, 不過食一陣又匿返入去啦. 雖然食得好少, 肯食我都冇咁擔心!

捐出黎聞下d糧:

行出黎食:

可能貓都係晚黑活躍d, 夜晚佢戒心似乎冇咁大, 我叫佢佢會行出黎, 然後四圍巡下, 仲肯食返多D野添!

初來報到

2008年8月4日, 小肥貓搬黎我度住, 同佢一齊搬黎既仲有佢d用品及食品:

小肥貓黎到陌生環境好驚慌, 當時屋入面個個都係佢熟識既人, 佢都驚到即刻搵地方匿, 果刻對佢黎講最就腳位置就係近門口櫃底, 仲有幾個鞋盒俾佢做掩護添(呢幅相影得太黑, 其實櫃底有光管, 不過我怕開燈更加嚇親佢):

小肥貓一匿就匿左接近12小時, 其間有郁少少轉下身, 但就唔食野, 我移開鞋盒將貓糧放響佢面前佢都唔食, 要逐粒餵先肯食幾粒, 水就一滴都冇飲!

直至晚上11點幾, 佢終於行出黎啦! 我同老公睇緊電視都唔敢郁, 怕驚動佢, 老公第一次見佢真貓, 覺得佢好似隻老虎仔呢~

佢好似要巡視新居咁, 由廳開始, 跟住到廚房, 書房, 廁所同睡房, 逐間好謹慎咁慢慢巡慢慢望, 呢度聞下果度聞下:

最後佢選擇左睡房窗台, 響窗簾後休息, 不過半夜卻行返出房, 唔知點解匿左去馬桶後面, 果個位好污糟架嘛, 我唯有夾硬捉佢出黎, 跟住佢就匿入梳化底直至第二朝啦!

主角出場

呢位就係本blog主角-----小肥貓:

小肥貓係一隻三歲大既啡色虎紋英國短毛貓, 呢幅相影得佢好似好man好cool咁, 其實佢係個活潑得黎傻更更既小朋友, 性格友善, 鍾意嗲人, 為食貪玩而且充滿好奇心添!

想知多d呢位小朋友既得意事, 就要多d黎呢度探佢啦~