成功搬blog了

幾經艱辛，終於將Yahoo! Blog既網誌搬晒過黎啦! 成個過程暢順的話我估兩日唔使，不過唔知係我太蠢定係太唔好彩，竟然用左大半個月!

過程中其實由頭至尾我都係一舊雲，睇左blog友吉孖媽網誌圖文並茂既詳細教路，見好似唔係好難，又見其他blog友都留言搬屋成功，就跟住steps開始做，點知卻遭遇連番挫折!

首先係將舊blog相片上載到Google Drive，搵出host名備用，但我點搵點click都只係出得相片名，出唔到前面的host名，唯有delete所有相片從新上載一次先搵到!

第二個挫折係download完blogtrans做左d匯入匯出步驟之後，用notepad開返save左的file時出左問題，又要從做! 雖然唔使花好多時間，但兩次咁簡單既步驟到我手上都出問題，我有預感之後都未必會暢順呢!

果然第三個挫折跟手就到! 開左notepad file之後要將裏面每張相片的碼由屬於Yahoo!改成host名，咁第日 Yahoo!執笠d相響blogger都唔會睇唔返。原本只需一個步驟(以新名取代舊名)就可以完成所有替換，我做極都唔成功，向吉孖媽請教後先知道我實在太好彩了，由於Yahoo!舊名每個最尾都有D唔同，我要逐個逐個搵出黎改!

http://blog.yimg.com/3/_gN_alR7s59MvJ_.vEq5wnoOUUk.KDSXnKZ3TpsVuxT76c8TAVXfdw--/7/1/CmX_i1uMyaeRaiaU2f34Aw.jpg

http://blog.yimg.com/3/_gN_alR7s59MvJ_.vEq5wnoOUUk.KDSXnKZ3TpsVuxT76c8TAVXfdw--/24/1/kx8fRowJ3tzd8QzOct37aw.jpg


就係紅色既數字令到我每張相前面果節名都唔同，唔可以一次過取代!


果刻我知道要逐張改簡直想死!! 好想放棄停工唔做! 但唔做舊blog既野就會無晒! 雖然之前有諗過唔搬blog啦，響blogger繼續寫就算，但頭兩個小挫折都克服左，到臨尾先放棄又好唔抵! 結果唯有死死地氣做! 舊blog有近900張相，響大堆亂碼當中搵過千個亂碼相名出黎改(有d相名唔止出一次)，真係睇到我眼盲咁濟!

改好名又由頭至尾check過兩次應該無甩漏，終於可以進行最後一個步驟 ---> 響blogger匯入網誌啦。呢個step好快完成，見到D網誌出返晒黎，真係好開心，好有苦盡甘來既感覺呀~

以為故事完美結局嗎? 入返網誌一睇，文字無問題，但相片size就有大有細，好多變成超大張! 我嘗試編輯網誌改返相片size，小部份可以就咁改，但大部份改唔到，要從新save相再上載再插入，又花左我好多時間! 到改左大約三份一，愚蠢既我先無意中發現要更改相片size，要先選"原始大小"，再選擇自己想要既size，無先選"原始大小"就click咩都無反應! 編輯時更經常遇到"網頁發生錯誤"，挑戰我既忍耐力!

當大家睇到我呢篇blog，所有由Yahoo!搬過黎的網誌應該已經整理妥當了，響呢度要多謝blog友們既教路，特別係吉孖媽，我響email都煩左佢好多次!

呢個係佢教搬blog步驟既link：
http://gutgutmama.blogspot.hk/2013/09/blog-post_9.html#more

呢度仲有其他與blogger相關既有用資料：
http://gutgutmama.blogspot.hk/2013/09/blogspot.html

Post埋上黎希望幫到有需要既blog友~

搬blog呢個大project，我係為左小肥貓先咁有動力完成，而佢亦都好乖一直都有陪住我，通常我一用電腦，佢就會入黎陪我，有時響琴椅上/下面攤抖，有時就坐上枱望街：

通常望一陣又會轉返身對住主人：

主人忍唔住摸小肥貓，小肥貓又鍾意枕住主人手瞓：

不過越瞓越過的話主人就會請佢走架啦，尤其係改相名果段時期唔能夠有差池，佢差錯腳踩親keyboard我就多得佢唔少!

俾主人趕落去既小肥貓，仍然愛痴住主人呢：



加入Blogger的第一篇網誌

響Yahoo!寫blog唔經唔覺已經五年, 自己一直唔係勤力寫blog既人, 收到Yahoo!停blog通知曾經一度諗不如算啦唔寫啦, 要做back up又要搵新地方, 對我呢個電腦白痴黎講真係幾有壓力。不過當逐篇重溫返自己寫過既內容, 睇返d相, 回憶返當時既事, 又覺得停寫實在可惜。

寫blog期間認識左好多blog友, 雖然大家素未謀面, 但響blog度都會互相關注近況, 又會分享意見及經驗,  感覺好warm好正面。 期間有部份blog友轉場去Facebook, 我有Facebook account但唔係活躍份子。 雖然Facebook同blog都係分享平台, 個人感覺前者有d"監"人睇, 只要add左做friend無論熟唔熟對方想唔想知你近況或見你個貓樣都好, 你一post上去對方就焗住睇到, 而後者通常係有興趣關心你近況先會入黎探你既朋友。對我黎講寫blog比響Facebook更能暢所欲言, 黎探小肥貓既都係養貓或愛貓之人, 我可以毫無保留響度抒發對小肥貓既疼愛。 「貓奴」呢個身份, 響現實生活中都係低調d好! 嘻嘻~

講完自己感想, 又點能夠唔交待下主角小肥貓既近況呢! 佢岩岩先病好咋, 早排抓損左眼角搞到眼仔有d不適, 幾日後突然係咁打噴嚏, 剛食完十日藥。平時響屋企做慣小霸王既佢, 去到診所就變成鵪鶉, 由頭到尾震震震任醫生舞來舞去, 睇見都心痛啊!


響袋度等緊見醫生:

應該係貓生第一次試戴頭罩:

好想整甩頭罩呢:

睇醫生順便驗血做埋body check, 俾醫生剃左忽毛:

驗血報告小肥貓各方面狀況都好好, 我最擔心佢腎有毛病, 結果相關指數好OK無超標, 醫生亦話唔使照x-ray或超聲波啦!

早排執屋一對啞鈴唔知收去邊好順手放左響窗台, 結果就俾小肥貓睇中左, 經常挨住瞓:

出完呢篇blog, 要去舊blog果邊做返back up啦, 有無朋友知道點樣將Yahoo! d舊blog搬過黎?

You're so handsome~

“You're so handsome” 係我每日對住小肥貓講幾十次, 講極都唔厭既說話~

響主人眼中無論小肥貓做緊乜, 咩表情咩姿勢, 都係最最最靚仔既!

主人當然明白小肥貓並非天下間最靚最好既貓, 但身為一個無藥可救既貓奴, 佢所有行為(包括惡行)我都發自內心覺得可愛!  響屋企, 老公角色係嚴父, 小肥貓曳佢會責罵, 樣衰論盡會毫不留情指住黎笑, 而我永遠扮演過份溺愛及保護小肥貓既怪獸家長, 小肥貓永遠是對的!

在我眼中, 佢諸事八卦係聰明好奇既表現; 搞搞震搞破壞係活潑好動; 為食猴擒係真情流露唔作狀; 又笨又論盡時係天真可愛; 跟出跟入阻頭阻勢係愛主人陪主人既表現; 至於咬主人出手打主人啦喎, 當然就係不畏強權, 甚至有時係搞笑有趣既表現添啦!   雖然我都會鬧佢, 但老公話果d鬧同大聲少少講野無分別, 鬧兩句之後我仲會摸返佢讚佢handsome, 然後抽水強吻當懲罰.  老公對我失去理智既情況已經見怪不怪, 對我樣樣野都讚小肥貓幫佢講好說話亦已經有免疫力. 幾荒謬都可以擰擰頭笑笑口就算~

有時我都諗, 好彩我養既係貓, 如果係人仔, 肯定會培養出個是非善惡不分既港孩囉!

我唔知其他貓友會唔會好似我咁縱貓, 老公話我已經中晒貓毒, 且是不治之症!

最近我發現小肥貓魅力不可擋, 連父親大人都有中毒跡象.  話說有次同佢行寵物店, 玻璃屋內有幾隻幼貓, 其中一隻佢讚話幾靚, 我講笑話有無我果隻靚先, 父親大人竟然好認真咁話"你果隻靚d"!  買完貓糧出到店門口, 我指住紙板廣告上隻貓話"呢隻幾靚丫~", 隻貓同小肥貓一樣係啡虎紋英國短毛貓, 個樣好BB又靚又精靈, 點知父親大人話"呢隻太瘦啦, 你果隻靚d!" 我聽完真係笑左出黎, 忍唔住同佢講"呢隻唔係太瘦, 係你見開果隻太肥咋!"

靚仔黎啦!

威武嗎?

可愛的波子眼:

好似笑緊咁 :

佢眼中好似有我呀!

無所事事look一樣咁靚:

呢張早兩日影架, 小肥貓眼定定望住支釣貓棒:

瞓到一pat 野咁依然handsome~~

小肥貓你真係好靚仔呀!!! You are soooooo handsome~~~~~~~~