肥貓禁地(一)

小肥貓最初黎我地屋企, 我同老公定左一D地方係嚴禁佢踏足既.

第一個禁地係廚房, 怕佢慣左入去跳上跳落, 如果撞岩開緊煮食爐就大件事, 而且廚房有碗碟有食物, 痴到貓毛都唔係咁衞生!  

不過, 關廚房門會阻隔門鐘既響聲, 如果我響房間而又關埋門, 鐘聲就更難聽到. 試過有客人按左好多次鐘我先知道, 亦有客人企響門口打電話俾我叫我開門! 要避免呢D情況再發生, 我唯有開返廚房門, 任小肥貓自出自入啦!

廚房解禁我就唔懶得啦, 為防止佢搞搞震, 廚房要時刻保持乾淨企理, 用過既碗碟要洗好, 食物收好, 細細件濕濕碎碎既物件亦最好收埋, 如果唔係小肥貓就會施展"乾坤大挪移", 將調味包移左去廁所, 將飲管移去櫃邊, 將蒜頭移去梳化底, 仲會將解凍中既雞柳移去廳中間添!

就算冇野俾佢玩, 只要廚房門開住, 佢都鍾意耐唔耐入去巡下, 留底幾執貓毛! 所以我地亦要留意洗手盆乾唔乾淨, 最好唔好有水漬添, 唔係佢巡完場我就有排抹地架啦!

講完小肥貓D曳野, 都要讚一讚佢既~ 其實佢好乖好聰明架, 知道我地唔俾佢入廚房, 有時乍乍弟跟左入黎, 我地叫佢出返去, 佢都好聽話行返出門口等. 如果我地響廳見佢想入去, 叫住佢都會即刻停步. 而如果佢真係偷偷地入左去, 聽到我地腳步聲行近, 就會雞咁腳半跑出黎, 擺明知自己做虧心事咁, 好搞笑呢~~

隔住廚房門影佢:

 

佢好乖咁響門外面等:

 

等得耐會攤響度:

有時本來佢響梳化或椅上瞓覺, 我入廚房做野, 做做下擰轉頭都會見佢響門口陪我, 真係好抵錫架~

溫馨時段

小肥貓係一隻好友善, 好喜歡親近人既貓貓. 平時響屋企我同老公行去邊, 小肥貓就會跟去邊, 乜都要睇下八下. 如果我地忙緊唔理佢, 或者禁止佢行近阻住, 佢亦會懂事地行埋一邊, 搵個望到我地既位置休息, 唔會騷擾我地~

同小肥貓一齊最溫馨既時間, 就係當我地一坐落梳化, 佢就會即刻走過黎挨住我地坐, 用頭仔猛咁撞我地, 仲會反晒肚要我地摸佢添. 而如果我地一路坐住唔走, 佢都會好乖咁一路陪住架!

我好鍾意影佢挨住我坐 (可惜用手機影效果唔好):

  

試過瞓成咁:

小肥貓亦成日挨住老公坐架:

個樣好似向我示威咁:

呢張最妙, 小肥貓插左對手響老公大脾之間:

我見佢咁得意於是拿拿聲影, 影完唔抵得佢咁嘆, 咪摸下佢搞下佢囉, 點知佢坐到定晒一D反應都冇, 連我出絕招強吻佢都唔走, 平時我一錫佢就即閃架嘛!

雖然話就話唔抵得, 但睇到老公同小肥貓咁溫馨, 咁老友, 其實係開心都黎唔切就真~~