以前我對貓既認識好膚淺, 以為貓高竇唔睬人, 唔聽命令, 我行我素. 幾年前開始同貓多D接觸, 先知原來貓都幾友善, 會親近人, 明白人既說話.
到養左小肥貓, 更發覺貓既性格竟然可以好“狗”----- 小肥貓就好似狗狗一樣咁痴人, 鍾意跟出跟入, 好動又八卦, 甚至會幫忙招待客人添~
佢係屋企既親善大使黎架!
小肥貓唔怕陌生人, 初次見面既客人摸佢撩佢玩佢都唔會抗拒, 會主動挨向客人示好, 或者響地下碌來碌去. 就算主人唔響身邊, 小肥貓都唔會冷落客人, 客人撩佢玩佢會走近, 仲試過好嗲咁挨住客人, tum得客人好歡喜添!
小肥貓挨住客人坐:
有時小肥貓怕客人悶, 會表演節目娛樂下. 佢最拿手既項目就係即興搞搞震, 例如八卦客人帶來既物品, 裝人地紙袋裏面袋左乜野, 更會忍唔住出手搞/咬客人衣物或手袋上既拉鏈扣, 小吊飾等! 好彩小肥貓都算聽話, 只要客人叫住佢或輕輕擋開佢, 佢都會立即停止.
小肥貓八卦袋入面既野:
有客人又發現出動某D“道具”可以令小肥貓做升級表演.
例如有客人用公仔鎖匙扣引小肥貓, 小肥貓係咁追住要玩; 有客人俾條絲帶佢, 佢玩到碌來碌去又爪又咬; 有客人肚餓拎餅仔出黎食, 小肥貓竟然老實不客氣地企上人地大脾, 想人分D俾佢食! 呢D都係客人事後講返俾我知, 好彩佢地講既時候都仲係好好笑咁, 唔似覺得小肥貓麻煩失禮咋!
小肥貓好鍾意玩呢類小玩具, 自己一個都玩得好投入好開心:
下面三張相要多謝客人友情客串:
睇唔睇到小肥貓想做乜?
佢要玩鞋帶呀!!!
出口又出手添:
呢張就係舊相, 示範佢點樣企響人地大脾睇人食野:
相中人係老公, 不過小肥貓對住有食物在手既客人亦一樣係咁勇往直前呢!
客人之中當然亦有怕貓既, 有一位幼稚園小朋友一見到小肥貓就驚, 要我抱起小肥貓先敢入屋, 亦有大人唔敢留響廳度同小肥貓單獨相處. 不過隨著日子過去, 客人都知道小肥貓其實好溫和, 加上我教左佢地一D防小肥貓近身既招數, 好快佢地已經唔再怕, 果位小朋友亦敢快步從小肥貓身邊行過, 仲夠膽響我抱住小肥貓時細細力摸佢添.
小肥貓已經係屋企重要既一份子, 好多時小朋友入屋第一件事唔係同開門既我打招呼, 而係周圍搵小肥貓響邊, 望到小肥貓先安心. 有小朋友話小肥貓係佢最鍾意既寵物, 要攞小肥貓返屋企養.
更有唔少客人同我講, 話仔女(幼稚園至中學生都有)成日提住要養貓. 有一位後來真係養左兩隻英國短毛貓, 其中一隻仲同小肥貓一樣係啡虎紋毛色添!
