三個月了

不經不覺與小肥貓同居已經三個幾月啦, 有時望住佢, 我仍然會諗: 係咪發緊夢呢!

諗返最初佢黎果段日子, 人同貓都好唔適應, 特別係小肥貓, 成個生活環境甚至照顧佢既人都唔同晒, 以前佢有大屋住, 有其他貓貓同佢玩, 新地方唔單止冇晒d朋友, 就連可以跳得高d, 跑得快d遠d既空間都冇! 而我同老公就要脫離輕鬆既二人世界生活, 照顧多個小朋友!

最初諗養貓以為好輕鬆, 貓貓自理能力高, 唔依賴主人, 又唔需要帶出街, 應該冇乜麻煩! 點知原來湊一隻貓都唔係一件易事! 或者我太緊張啦, 好多時都擔心唔知佢夠唔夠飽, 悶唔悶, 開唔開心, 天氣熱擔心佢一個貓響屋企冇冷氣會熱壞, 出街晏返餵唔切又驚佢餓壞, 唔得閒陪佢玩又怕佢悶親! 再加上要做好多家居清潔工作, 更加搞到個人好攰兼且周身唔得閒!!

經過三個多月既相處, 人同貓都逐漸適應. 小肥貓除左肚餓同要人陪, 好少好似初黎時大聲叫不停, 半夜亦好乖好靜自己瞓覺(不過七點幾肚餓就會叫), 佢仲好聽話好痴人, 同老公相處得好好添~

宜家唯一既煩惱, 就係小肥貓d寄生蟲仲未好, 問過醫生又上網睇過, 都話梨形蟲好難斷尾, 因為貓貓會lam自己, 如果便便後身上沾有蟲卵, 又或者蟲卵被帶離砂盆污染到周圍環境, 再沾到貓貓身上, 又會好容易俾佢lam返落肚! 為左小肥貓既健康, 我日日用消毒藥水抹兩三次地, 枱同櫃以至佢經常掂到既地方都盡量消毒, 上星期開始更日日清洗砂盆! 布梳化難清潔, 唯有勤d洗梳化套, 睇下好唔好d.

希望小肥貓可以快d好返就好啦~~

佢好鍾意挨住人坐架:

睇下瞓得幾舒服:

俾佢咁挨住真係覺得好開心好溫馨, 唔捨得行開呢!