2014年5月11日 星期日

變臉

小肥貓係一隻唔怕生、好痴人既貓貓,鍾意挨住人坐,鍾意俾人摸。我自細愛狗,對貓好感卻一般,未認識小肥貓之前,完全想像唔到貓既性格可以咁似狗狗,咁可愛可親!
不過貓始終係貓,總有高傲自我唔服從既一面,小肥貓都唔例外。今次要爆既就係佢舜間變臉既奇技。

小肥貓明明鍾意俾人摸,主人坐梳化佢一定馬上跳上黎挨挨撞撞討摸,到主人摸佢啦,一邊摸一邊仲明明聽到佢冧到爆既咕嚕聲,點知突然擰轉面就要咬主人隻手,有時係做下樣咬,有時卻真係咬得幾大力幾認真下!

梳毛果陣又係咁,小肥貓明明好鍾意主人同佢梳毛,一見主人拎把梳出黎就好乖好主動埋位,邊梳邊享受地又挨又典咁,但突然間唔知佢邊忽傻左,定係主人唔覺意掂到佢身上邊忽禁地,突然佢又會出口加出手。主人避開之後繼續幫佢梳,佢又好似乜事都無發生過繼續咕,繼續用頭仔大力撞主人,然後又突然再咬/爪過!當第三次變臉,主人只好無趣地收梳退下!

口講無憑,有相為證!早兩日小肥貓入房瞓,佢仍然鍾意枕住主人隻手,以前枕得好定,果晚枕左一陣就變臉。

開頭好乖:







突然捉住主人手就咬:







主人喝止小肥貓,佢亦知機停口。

呢個就係佢俾主人話完既樣啦:



第二晚主人再俾小肥貓入房,睡前主人習慣睇陣書,小肥貓挨住主人:



望到咁可愛既背影,主人忍唔住伸手去摸:



摸一陣佢又想變臉啦:



今次主人先發制貓作出警告,小肥貓唔敢放肆啦!



唔知有無BLOG友可以解讀小肥貓既變臉行為?你地既貓貓又會唔會有咁既情況?


題外話,響FACEBOOK DOWNLOAD左張講貓咪瞓覺位置既圖:



以前小肥貓鍾意瞓床尾,慢慢同佢瞓多左之後,佢既位置亦越移越上,宜家會先瞓響我枕邊,瞓到咁上下先換位,有時去返床尾,有時會挨響我腰旁。試過有朝小肥貓叫我起身,響我身上踩來踩去我都扮瞓唔理佢,無奈之下佢竟然坐左上我枕頭,用肚腩暖住我頭頂!

雖然同貓瞓有時幾辛苦,手會痺(佢枕住我唔捨得抽返出黎),身會硬(唔敢轉身怕整到挨住我瞓既小肥貓),又瞓得唔好(半夜會醒然後望下佢響邊),不過呢d辛苦都係甜既,再多都唔怕!







2014年4月5日 星期六

我們是一家

唔經唔覺小肥貓加入我地家庭就快六年啦,係家中不可缺少既一份子。
之前我響blog一路只係post自己同小肥貓既親密照多,今次就出返d老公與貓,同埋日常家庭照啦~ 

小肥貓都鍾意挨住老公坐架,不過始終老公響屋企時間唔多,佢地親近既機會較少。


























小肥貓鍾意掂住老公,老公亦會調整姿勢配合~




















咁岩影到佢打呵欠:




















又掂住啦:


























呢張有埋眼神交流添:


























做左無耳貓: 




















咁既表情,究竟後面位按摩師技術如何呢?


父親大人到訪,我地三個坐梳化睇電視,小肥貓響佢專屬位置陪我地:


























下面呢張我要解釋一下啦! 當時我屈膝坐響梳化,老公打橫攤雙腳放左響我大脾上面,點知小肥貓又黎湊熱鬧,枕住我隻腳瞓:


























話晒一家人,有嘢食梗係關貓事啦!

有晚朋友黎屋企食飯,飯前我地拎左d零食出黎,小肥貓鬼鬼祟祟響到裝呢:


























主人食梨,佢想玩個掟:








平時我地食飯一定唔會俾小肥貓上餐枱,無野好八好玩唯有玩爭位坐!
小肥貓特別鍾意爭老公個位,行開裝碗飯返黎已經俾貓坐左:



講左咁耐,梗係唔少得我同小肥貓既親密合照啦!

可能我響屋企時間長d,小肥貓都係鍾意痴我多d:



主人摸得佢好舒服架:



床照黎啦!以前小肥貓多數瞓床尾,慢慢越瞓越上,宜家鍾意枕住主人手瞓呢:





呢張係咪影得小肥貓好靚仔呢:


2014年2月3日 星期一

恭喜發財

恭祝大家新春大吉,馬年進步,身體健康,心想事成,萬事如意!
祝各位既小寶貝們活潑健康,開開心心,無憂無慮!



小肥貓著住件過年衫仔係咪份外醒神呢?

平時我無俾佢著衫架,淨係新年先著黎應下節影張相,今年專登買左件新衫俾佢,size好合身,不過主角就勁唔合作,睇下d拍攝花絮就知!


一著起件衫仔就勁碌想除:






小肥貓好唔鐘意,條尾發得好用力:



除到一邊手啦:





我幫佢著返,佢送個凌厲既眼神俾我:



呢張係唯一一張好樣d既:




















影完即刻變樣:




















繼續除:




















又掂左:





































見小肥貓咁唔鍾意又越來越忟憎,我都唔忍心再逼佢了。

除左衫仔之後佢依然餘怒未消,捉住我大大力咬左兩啖呢!

有時見blog友們的貓貓好順攤可以任舞,著乜戴乜都得,都覺得好羡慕。不過養貓之後我學到一樣野,正確d講係養左隻咁有性格既貓之後我學到一樣野,就係要接受,而唔係去改變一個人/動物!我愛小肥貓,佢肯唔肯著衫,聽唔聽我話都好,我都一樣接受佢,一樣咁愛佢!老公講得無錯:我係一個超級無敵貓奴!:p

2014年1月14日 星期二

與貓合照

呢篇係2014年第一篇blog,雖然遲左少少,都響度祝大家新年快樂,人貓都開心、健康!

同小肥貓一齊生活左咁耐,為佢影過無數張相,但合照卻好少,更加無乜幾張見得人!一來貓唔似狗鍾意出街,可以帶去唔同地方影相轉下場景,影來影去都係屋企果四幅牆其實幾悶!二來小肥貓真係唔鍾意影相,一見我舉起手機就會擰咩面,引佢擰返過黎又會整個屎面出黎,影獨照已經咁有難度,合照更加具挑戰性!

我同小肥貓既合照多數係自拍,要吼佢好定果時我坐埋佢旁邊先拍到,但受制於手機質素,d相影出黎通常偏暗偏黃好肉酸,影完自己都唔想睇。

唔要自拍唯有請老公幫忙,老公見我同小肥貓成日“依依泣泣”已經眼冤,叫佢影埋相更加萬分不情願,叫得郁佢準備得黎貓都走左!想抱住小肥貓影咩?抱一陣還可以,耐d就會出口,未影得切就要放低佢了。

不過最近我又可以同小肥貓影多d相啦,過年前換左部新手機,影相快左又有連拍功能,可以影多d又揀到多d稍為見得人既相啦~

以下相片係除夕倒數完返屋企影架:


呢張小肥貓個樣仲幾寬容:


























呢張有點 cool呢:






好似想吻向主人,其實係扭晒頸掙扎緊:


























好似好嗲咁挨落主人膊頭,其實佢手腳都響度撐緊,只係俾主人大力夾住郁唔到:


























俾d以前既合照大家睇下:


呢兩張係自拍,顏色同清晰度都唔得:


















































同一位置及光線,唔用自拍就清楚好多:


























呢張係友人黎探訪幫我影架,亦係第一次咁樣抱到小肥貓:


























呢張想扶住小肥貓望鏡頭,變成「鍊」到佢好辛苦咁:


























呢張似唔似大青蛙夾住隻肥烏龜?


























呢張係第一次老公咁主動又咁把握時機影架,當時我好攰響梳化瞓左,小肥貓又係響佢張床仔度瞓,瞓醒佢行出黎裝我又錫我:



























小肥貓好少主動錫我,俾我強吻就多,果次開心C我呢~~~~