肥貓禁地(三)

第三個小肥貓禁地係睡房, 呢度初頭並唔係禁地黎架, 係自從小肥貓被誤診有梨型蟲, 我要縮減佢既活動範圍先唔俾佢入. 不過後來知道唔關生蟲事, 睡房都冇即時解封, 因為呢間房已經變成全屋最亂既地方, 原本放響廳既公仔, 擺設, cushions等, 加埋平時懶得執拾既雜物統統搬晒入去...... 除左張床同旁邊少少位之外, 己經冇地方俾人同貓落腳!

唔俾小肥貓入就要成日關住度門, 早排回南天空氣潮濕, 睡房成日有陣UP味, 牆身仲開始有少少發霉添!! 結果, 為左通風起見, 第三個禁地又同前兩個一樣, 變為局部時間解封, 小肥貓有多個地方逛下啦!

小肥貓好鍾意伏響床尾位:

好偶然會響床頭:

我見佢乖乖地定定地, 會由得佢攤抖耐D, 但如果搞搞震, 就無得留底架啦! 不過小肥貓通常好乖, 想曳曳時我大聲D叫下佢, 佢就唔敢亂黎!

有時我好攰入房小睡, 佢會入埋黎陪我, 仲鍾意瞓響我對腳上面添:

雖然我都好享受有佢陪住瞓下覺, 但夜晚瞓覺就一定唔會預佢, 一來佢瞓床尾我同老公怕一下唔覺意踢左佢落床, 二來佢會行出行入, 出去時好靜, 入黎就會好有禮貌咁同你打招呼, 半夜三更會俾佢嚇醒! 反而佢自己響廳瞓就仲安靜, 大家都有安樂覺瞓!



溫馨小插曲:

老公唔太鍾意俾小肥貓入睡房, 怕成床都係貓毛, 又怕佢呢頭去完廁所果頭跳上床好唔衛生, 所以通常老公唔響屋企我先俾小肥貓入房.

有次老公響度, 我入房時小肥貓竄入左去, 過左一陣仲未出黎, 我怕驚動老公, 諗住開零食罐會引到小肥貓出黎, 點知都係俾醒目老公注意到. 老公話: 你仲俾野佢食? 喝佢出黎咪得囉! 然後非常正氣凜然咁行入房! 我想像到小肥貓急急腳飛機耳咁行出黎個樣, 但結果卻出乎意料之外!

小肥貓一見老公行入房, 就發出左一聲又長, 又開心又嗲既叫聲, 我離遠聽到都即刻冧晒~   結果小肥貓不單只冇俾人趕出黎, 仲有人坐埋佢旁邊摸佢, 問佢係咪坐得好舒服添!!

肥貓禁地(二)

第二個唔俾小肥貓入既禁地係書房, 怕佢咬書咬紙, 更怕佢抓花部鋼琴! 而且呢間房多小朋友出入, 貓毛通處揚會容易引起佢地敏感!

不過, 書房係我用得最多既地方, 上堂, 練琴, 用電腦都響裏面. 小肥貓係隻好痴身既貓貓, 長時間關埋門佢響外面會投訴, 我上緊堂梗係唔會睬佢, 慢慢佢好似明白咁, 聽到琴聲識自己乖乖搵位瞓覺, 冇琴聲先黎叫! 最初我好強硬唔理佢, 諗住佢叫一陣會自動收聲, 點知原來佢可以好長氣!

聽見佢聲聲淒厲既喊叫, 就算忍心唔理, 都會覺得心痛, 又怕佢叫咁耐咁大聲會惹來鄰居投訴...... 就係咁, 書房又變成局部時間解禁, 有時俾佢入黎逛下, 如果佢乖乖地就由得佢響入面陪我, 搞搞震就即時遞解出境!

呢張係第一次小肥貓入書房陪我時影, 佢瞓到半路俾我影相整醒左:

佢鍾意企響電腦枱後面望街:

可以眼定定咁望好耐:

電腦後面有好多電線及插頭, 如果佢想搞想咬會即時冇得留低, 如果乖就留幾耐都得:

但咁就會阻住我做野:

難得佢唔周圍搞, 由得佢瞓下先啦:

其實書房真係冇乜地方岩小肥貓行, 正確d講係冇乜地方我放心俾佢行, 因為我唔准佢掂部琴, 又唔准佢行近D書, 所以佢十次入黎, 八次都好快俾我啲返出去. 早幾個月我買左部平平地既NETBOOK, 可以響廳做野同上網, 咁就唔使成日將佢拒於門外啦!

而我練琴既時候, 佢會好乖響門外面等:

嫌我彈得悶, 唔好聽呢: