溫馨的床照

每次老公出trip就係我同小肥貓「偷情」既時間, 早排我地又有機會啦, 仲影左好多溫馨床照添~

我習慣臨瞓睇小說或者玩手機, 小肥貓挨住我:



就咁影佢背脊有d單調, 放隻公仔點綴下:



Snoopy企唔穩要挨住小肥貓:










見小肥貓反轉晒咁望住我, 又點忍得住唔摸下佢呢~


我一伸手埋去小肥貓就主動掂住:



R下佢先:







單手影相有d難度, 不過我一縮手, 佢就碌大對眼望住我:



放返隻手落去, 佢又即刻掂住啦:



輕吻我的手:



用頭仔輕擦:



呢個Pose似唔似隻海狗?



摸佢條頸個窿:



眼瞓了:










我都好眼瞓呀, 但唔捨得郁~

過左十多分鐘小肥貓自己行開了!


呢個姿勢.......我都唔識形容!



落床熄燈時幫佢補影返張正面照:


可惜係個傻更更既眼瞓樣, 唔夠靚仔呢~

 

身體檢查

因為懷疑小肥貓腎臟有毛病, 五月中我同老公帶左佢去診所做檢查順便洗埋牙~

果朝10:00未夠, 小肥貓已經到診所啦!

等緊見醫生:

小肥貓好怕出街, 一入籠就狂叫亂撞, 不過上的士就會安靜落黎, 響診所更加粒聲唔出, 可能佢知道點叫都無用了!

當日洗牙同檢查一切順利, 驗血報告就有少少過唔到關, 有兩項腎指數超標.




CREA高有機會腎功能出問題, 醫生建議小肥貓做多項尿蛋白比例測試.



兩次測試結果都正常, 即是唔可以確定係腎功能有問題!

至於CA偏高亦可能由腎石或腫瘤引致, 要照超聲波先睇到, 不過因為超標唔多, 醫生覺得唔需要急住做. 佢建議觀察多一排, 一個月後再帶小肥貓返去驗多次血, 期間我要記錄低佢每日飲水同尿尿既份量.


呢張相係當日下午接返小肥貓時影架:


佢驚到勁甩毛, 仲嬲左我唔睬我添, 無論我打開邊面門, 響邊一面撩佢摸佢, 佢都擰返轉個身搵patpat 得住我.


響一個月觀察期間, 我按醫生吩咐每日量度小肥貓飲水同尿尿量, 醫生話以小肥貓體重計算每日應該飲200幾ml水, 但佢每日只飲70-80ml, 最多果日亦只係100ml. 可能屋企個磅同量杯唔夠準, 度到既尿尿份量同飲水多少又好似唔係好有關係!





呢段期間小肥貓仍然keep住每星期接受一次BICOM治療:


每次儀器都會check小肥貓身體各方面狀況, check到腎有需要就做針對性治療, 否則就協助改善其他問題, 例如腸胃及食物敏感. 原本小肥貓對穀物敏感, 宜家已經可以食返啦~


下面係第二次既驗血報告:


兩個指數都有進步, 剛好回落返正常範圍啦!


小肥貓個驗血報告pass左我真係好開心! 佢亦唔使面對繼續睇醫生, 食藥, 轉糧既痛苦!

由於兩次驗血之間小肥貓無食過藥, 飲食同平時一樣, 我亦無逼佢多飲水, 所以我都幾相信係BICOM治療發揮到作用. 由我懷疑小肥貓有問題到第一次驗血大約相隔左個半月, 期間小肥貓已經接受左幾次治療. 我諗如果無呢個治療, 指數可能唔止輕微超標呢! 

黎緊我除左希望BICOM儀器繼續check住小肥貓個腎有無事, 仲希望可以快d治好佢對奶, 芝士, 蛋黃既敏感, 呢d都係佢好鍾意既食物, 已經戒左口好耐了! 

最後都要讚一讚小肥貓, 雖然佢響屋企有少爺脾氣, 會發惡咬人又會鬧人, 但響診所就好乖好合作, 連抽血都好勇敢一d都無掙扎, 醫生姑娘都讚佢叻仔!

不過小肥貓其實係驚到唔敢郁就真, 抽血時佢忍住一粒聲都無哼過, 全身卻顫抖得好厲害!  諗起佢平時不畏強權個樣, 驚成咁真係令人好心痛. 


俾d露肉照大家睇下:

隻手好似得條骨咁! 我諗佢顯得肥都係因為d毛鬆o者!


條頸個"隆"就搞笑d:






我好鍾意摸佢呢個"隆", 可以摸到佢既皮膚.  老公有時仲會一路摸, 一路笑佢係"穿隆貓"添~