試糧

小肥貓既食物敏感狀況其實一直未好, 我只能夠盡量幫佢控制住, 佢一食左唔受得既食物好快便便就會見血, 敏感糧試過又肚瀉, 呢大半年我不停同佢試糧, 希望搵多D岩佢食既野~

乾糧試得幾順利, 好快試到兩款OK, 但濕糧就試左好多牌子好多口味都唔得, 有D食半罐便便已經見血, 有D就捱得耐D. 而除左試糧可以轉下口味之外, 小肥貓每餐只係食蒸雞肉溝乾糧, 我擔心營養唔夠均衡, 有時會溝少少脆肉瓜, 青瓜, 木瓜或者雞蛋黃, 佢都非常俾面, 食得津津有味~

呢餐小肥貓食乾糧, 蒸雞肉加脆肉瓜:

佢食得好快, 耷低頭係咁食, 天跌落黎都唔會理, 仲任搞唔嬲添:

話咁快食到乾乾淨淨:

最近屋苑商場開多左間寵物用品店, 專賣天然貓狗糧, 包括Almo Nature同Wellness既濕糧, 我揀左幾款以雞肉為主既俾小肥貓試, 第一款Wellness火雞脾加雞柳味食左大半包Touch Wood暫時冇不良反應. 希望小肥貓快D試食成功, 咁就唔使咁慘淨係食得蒸雞肉, 我又可以慳返好多功夫啦~



溫馨小插曲:

小肥貓食既蒸雞肉, 我買超市既包裝新鮮雞柳(後期為慳功夫已改用新鮮免治雞肉啦), 老公認為無必要買新鮮既, 急凍雞柳蒸熟都係一樣, 屋企隻為食貓都食唔出啦! 我當然冇聽佢話!

點知有次我唔得閒買雞柳請老公代勞, 佢竟然買左包最貴既返黎, “巴西雞柳”比“中國雞柳”價錢貴兩倍有多, 我問老公做乜咁闊綽? 原來佢傻更更見雞柳就拎, 根本冇留意產地價錢! 我一於唔理咁多, 笑佢口講要小肥貓食急凍野, 卻豪買貴價巴西貨, 對小肥貓認真唔話得呢~



小肥貓近照:

點解同上個BLOG既相咁似? 因為天氣凍小肥貓日瞓夜瞓, 已經貓帽合一啦~ 望到呢個樣我就諗起毛毛蟲結蛹包住自己, 小肥貓似唔似結左個"貓蛹"? 

我行近影相整醒左佢:

 



呢張佢坐響個新抓抓板上面:

呢個抓抓板俾佢玩左兩日咋, 下次爆佢玩得點瘋狂法~~~

小肥貓的聖誕帽

小肥貓其實都幾可憐, 響我度住左年幾, 最近先有一個屬於自己既窩!

舊年冬天想買張貓床俾小肥貓, 不過果時以為佢有梨形蟲, 屋企D雜物收都收唔切, 而且諗住佢瞓梳化都夠暖, 於是打消左念頭.

今年本來都唔打算幫佢買床架, 但早排天氣凍, 佢成日縮埋一舊龜SIT唔願郁, 企上我大脾時, 我隔住牛仔褲竟然都感覺到佢腳仔凍, 於是決定快D買張床仔俾佢. 

呢頂聖誕帽就係小肥貓既新床仔啦, 放上佢平時瞓開個位, 佢即刻行埋黎八卦:

帽上面吊住個小玩意:

小肥貓對呢個小玩意十分有興趣, 咬住玩唔肯放:

仲連頂帽都拖跌落地:

為左令小肥貓唔好掛住玩, 我剪走左個小玩意, 佢見冇野玩又唔知呢頂帽做乜, 就興趣大減啦:

:



呢張咁另類既床仔, 唔教佢就梗係唔識用啦!  首先我要令佢對頂帽有好感, 放粒貓糧等佢捐入去食, 試左幾次之後, 隻傻貓以為頂帽會"生"貓糧, 耐唔耐就行去聞下掂下, 但就仲未肯主動捐入去.

第二步就係要小肥貓覺得頂帽好好玩! 當佢向帽裏面裝裝下既時候, 我搞下頂帽, 貪玩既佢就會衝入去拍我搞既位置, 我地玩得好激烈架~

呢張影得暗左, 我兩隻手拎住相機, 改用隻腳同小肥貓玩:

 



就係咁玩下玩下, 佢玩到攰就直接響入面休息, 不過最初坐唔慣, 一陣就出返黎:

反而經常咁坐, 或者將頭仔LONG響帽邊, 可能仲係掛住食同玩啦:

頂帽放響度第四日, 佢識得自己入去坐啦!

我撩佢玩:

舒服地沖涼:

第六日, 小肥貓終於知道頂帽係俾佢瞓覺既地方, 想瞓就會自己捐入去, 日頭夜晚都係, 睇佢瞓得幾甜  :

買呢頂帽時其實我已打定輸數小肥貓唔吼, 諗住唔得咪當件聖誕裝飾囉, 收埋都唔係好佔地方, 宜家小肥貓用得著, 睇黎亦幾鍾意, 我真係好開心呢~

為食貓出事了

前幾篇BLOG提到小肥貓係超級為食貓, 冇諗住咁快又講佢為食, 點知尋日朝早屋企冇人, 佢竟然偷食呀!!!

我冇影案發現場, 因為顧住捉小肥貓黎鬧, 鬧完清理完搞掂晒先影低兩包「受害者」:

下面呢幅係事後補拍用黎解釋現場環境既. 芒果乾同栗子本來好地地響紅色籃入面, 上面有藤籃遮擋, 小肥貓拎左出黎食到通地都係, 紙巾同月餅盒亦都跌晒落地:

兩包食物都俾小肥貓從中間劏開, 芒果乾佢應該冇乜點食, 栗子就食左大半, 淨得6粒:

相信小肥貓一定食得好滋味, 食得好飽, 因為過左開餐時間兩個鐘佢都冇叫, 平時未夠鐘佢已經會慌死人唔記得咁大聲嘈架啦!  不過食飽晒又點丫?! 食得開心又如何丫?! 轉頭就瀉到七彩啦! 三個鐘瀉左兩次, 便便仲有血添.  我俾蒸雞肉佢食之後情況有D改善, 起碼夜晚冇再瀉, 到今日中午先瀉多次. 同肚瀉一齊既症狀仲有突然多左好多眼屎, 平時佢對眼好乾淨, 尋晚眼屎又多又濕抹極都有, 今日就好左好多, 希望佢快D好返啦!

偷食情況其實唔係經常發生, 因為我同老公知小肥貓受唔住誘惑, 會將食物放響佢攞唔到既地方. 今次係我失敗, 諗住未開既佢應該聞唔到唔會發覺, 點知確係低估左佢!

順便爆埋佢以往既犯罪記錄啦, 不過呢D都係貪玩, 唔算偷食既:

呢包係紹香園既唔記得乜酥, 我未食佢就幫我開左, 倒晒落地當波咁踢. 我搵左好耐先搵齊8粒, 一路搵一路諗, 少一粒你都唔使旨意今晚有飯食! (其實佢應該有食少少, 不過冇今次食栗子咁狼死)

珍寶珠俾佢攞黎當波踢, 旁邊既吉袋係裝合桃架, 點解吉既? 因為合桃又俾小肥貓LOOK晒出去當波踢咯! 兩星期後師傅上門檢查冷氣, 臨走遞幾粒合桃俾我, 話搬開張梳化執到架!

至於其它冇相為証既仲包括山楂餅, 蒜頭, FANCL潔面波波, 有時連樽蓋佢都岩玩, 五花八門不能盡錄.......不過見小肥貓咁得意玩得咁過癮, 我一邊鬧鬼佢, 一邊其實更加鍾意佢呢~



出返D小肥貓近照先~

之前個紙箱太細佢瞓得唔舒服, 我換左個鞋盒俾佢, SIZE剛剛好:

硬係鐘意LONG住個頭瞓呢: