爭位

上回講到小肥貓鍾意坐餐椅, 大多數時間都攤響上面. 餐椅唔只一張, 但佢係都鍾意同我地爭, 唔通爭返黎果張舒服D, 好坐D?!

爭位實錄:

影相當日我本來坐響餐椅, 佢響地下, 點知我一行開拎野佢就即刻跳左上去:

 

仲要縮起個身, 打死都唔走咁款:

 

我做緊野唔讓得個位俾佢, 就住慢慢坐返落去, 佢見爭唔贏, 剩返半個位又迫住唔舒服, 唯有死死地氣落返地, 過對面張椅坐:

 

個樣好無奈呢:

類似既爭位活動一日起碼發生一次, 通常係準備食飯時, 我同老公忙緊開飯, 佢已經霸好個靚位等住啦! 不過我估再過一排天氣熱D, 佢多數會瞓返地板, 未必會再同我地爭位坐啦, 到時或者我會有D失落呢......

一時一樣

小肥貓響我屋企, 鍾意久不久換下攤抖既地方.

舊年八月佢初黎, 可能係夏天既關係, 佢鍾意瞓地板:

入冬開始就改瞓梳化, 最鍾意瞓呢個位, 夜晚熄燈仲識自動埋位添:

最近小肥貓發現左另一處好地方, 就係餐椅啦! 平時我地習慣將餐椅推入檯下面, 早排我響餐檯做野佢跳上黎八卦, 我唔想佢搞搞震就拉張餐椅俾佢坐, 等佢八得黎唔使阻住, 而佢就真係好乖, 好定咁坐響餐椅陪左我好耐~

唔知係咪坐過番尋味, 果次之後小肥貓一見餐椅拉開就第一時間上去霸位, 搞到我地要就住就住咁坐:

而佢竟然仲轉到身喎, 不過就有隻腳唔知點放好:

睇佢個樣幾得戚:

早兩日小肥貓又叻D啦, 餐椅冇拉開都識捐上去:

佢可以瞓成個晏晝都唔落地架, 我行近佢先醒下:

打個呵欠:

仲罕有咁望住鏡頭露出笑容添:

點知唔夠五秒又繼續搵周公去也:

其實果個位好迫架, 轉個身都難, 都唔知點解佢咁鍾意! 有時佢郁來郁去碰到張檯, 仲搞到毛髮蓬鬆, 傻更更咁添~~

餵藥經歷

早排成日要餵小肥貓食藥, 過程有順利有唔順利, 亦有d搞笑野~

試過以前一個人餵藥俾佢抓傷, 又試過用"糖衣陷阱"呃佢俾佢拆穿, 呢次我同老公跟足指引, 用大毛巾包實佢只係露出個頭仔, 老公負責捉實, 我就負責餵.

初期小肥貓只需要食胃藥, 塞粒藥入佢口再掃佢喉嚨, 掃完以為佢吞左, 點知一停手佢就吐返出黎. 後來老公諗到個方法, 就係塞完藥立即塞多粒貓糧俾佢, 等佢為食食埋粒藥! 呢個方法好得, 小肥貓受唔住貓糧誘惑, 但又唔想食粒藥, 於是靠估求其吐返粒出黎, 搞笑既係隻傻貓次次都估錯, 變成吐出貓糧卻食左粒藥! 笑到我地死!! 咁樣餵左幾次之後, 我地直情唔使捉佢, 只需用兩粒貓糧夾住粒藥遞俾佢, 佢就會慌死蝕底咁拿拿聲食~

我地以為從此餵藥實冇難度啦, 原來開心得早左! 醫生加開14日抗生素俾小肥貓, 呢隻藥應該好苦好難食, 第一次佢當胃藥咁食, 食完即刻好辛苦不停伸脷想嘔, 第二次仲掂都唔肯掂, 連食開既胃藥都抗拒埋, 我地唯有再用返暴力.

小肥貓對食呢隻藥反抗好大, 嘔晒白泡都唔肯吞, 閒閒地要餵四五次先成功. 後來我地用"餵藥器"幫手, 將藥丸推到佢喉嚨最入, 再用針筒唧水入口迫佢吞, 效果就好左好多, 佢呑粒藥都冇咁辛苦.

呢段期間餵藥最幫得手, 付出最多既係老公!  為左小肥貓可以按時食藥, 老公連續十幾日專登早起, 夜晚又要減少外出, 餵藥時一邊捉住小肥貓一邊安慰佢, 更將小肥貓抱到貼近自己胸膛, 等佢仰起頭仔食藥時(正確d講應該係俾我夾硬抬高個頭翹開個口時)有得依靠, 仲成為我趁小肥貓動彈不得時肆無忌憚向佢抽水強吻既幫凶添!



睇下小肥貓個坐姿幾騎呢:

呢個角度睇都幾肥美:

佢知道我影佢, 即刻踩住我行左去第二邊呢:

雞柳餐

前幾日開始俾小肥貓轉食雞柳餐, 原本諗住再試一排敏感糧, 但佢肚瀉情況一直冇改善, 禁食後仍然瀉, 有時甚至一日兩次, 我見佢頭尾瀉左個幾星期, 加上有幾位blog友都推介雞柳餐, 就即管試下.

小肥貓對食雞柳一d都冇抗拒(基本上任何乾糧或罐頭佢都食得津津有味), 第一晚開始食, 隔日便便已經正常返晒, 回復以前靚靚既形狀同軟硬度啦!

我會繼續俾佢食一排雞柳, 希望唔會再肚瀉啦!



小肥貓既近照:

佢唔鍾意影相, 唔鍾意望鏡頭:

淨係鍾意八八卦卦:

想打開個罐偷糧呢: