廚房搞搞震

廚房係小肥貓既禁地之一, 亦係最早解禁既地方! 原因可以睇返呢度:

http://littlefatfatcat.blogspot.hk/2009/04/blog-post.html
平時小肥貓入廚房搞搞震我係事後先發現, 今次竟然好好彩影到(佢就唔好彩啦!), 就等我將佢D惡行公諸於世先~



開場先黎一個肥PAT, 唔知佢響度搞乜呢?

好似"R"緊痕? 喂我D碗乾淨架!!!

"R"得好過癮咁喎:

搞完碗搞筷子:

出口咬添:

成個頭"隊"埋D碗度究竟想搞乜?

小肥貓俾我篤左兩下, 轉身跳上焗爐頂 :

繼續周圍巡周圍八:

八下窗外有咩睇先:

搞圍裙帶:

可能小肥貓知我監視住佢, 手仔掂左條帶兩下就縮返!



檢查爐頭:

巡返去焗爐果邊, 睇黎又有不軌企圖啦 :

拉緊塊抹檯布出黎呢:

簡直係搞搞震無幫趁呀!!



下面三張相係早少少影既, 唔知點解佢對D碗特別有興趣~

仲跳上雪櫃頂添:

而響當晚小肥貓再次跳上雪櫃頂, 仲企高八卦, 抓甩左門鐘電線:

好彩冇觸電咋唔係就大件事啦!!

宜家門鐘已經駁返好, 老公將電線收密晒, 小肥貓應該唔會再"撩"到架啦.



果日仲影到兩張小肥貓既八卦相:

盒裏面有幾粒車厘茄, 佢唔食都要八!



轉左身再八:

真係一隻超級八卦貓呢!

小肥貓大戰毛毛棒

廣州亞運比賽正進行得如火如荼, 早兩日小肥貓都參加左一場自由搏擊賽, 對手係一支毛毛棒.

雖然佢地唔係世界級選手, 亦唔係正式運動員, 不過都鬥得好落力, 戰況十分激烈! 有相為証架!



兩位選手一碰面已進入作戰狀態, 毛毛棒鬆起雪白既毛不停抖動, 小肥貓隨即緊張迎戰, 鬚鬚都伸晒向前:

小肥貓跳起進攻, 毛毛棒身手敏捷及時避過 :

小肥貓遇到障礙物都毫不退縮, 出手快捷利落:

毛毛棒亦不甘示弱, 雙方拳來毛往, 旗鼓相當:

小肥貓出左招好勁既連環拳, 快到睇唔清呢:

中場節奏緩和左少少, 勝負未分, 雙方仍在對峙狀態:

毛毛棒改變招數, 從另一方向出招:

小肥貓一於奉陪到底, 唔打算放過對手:

戰圈擴大, 毛毛棒竟然引小肥貓去床仔, 諗住會限制到佢既發揮, 點知小肥貓仍然勇往直前出拳一D都無留手:

又黎對峙局面, 雙方認真地評估形勢及對手狀態:

小肥貓略施小計, 將策略由強攻改為施施然咁行, 等毛毛棒以為佢無力追擊放鬆戒備:

趁對手唔留神小肥貓突然猛攻, 毛毛棒險險避過:

毛毛棒都未黎得切定驚, 小肥貓已挺身而起同時雙拳齊發, 觸及毛毛棒後仲識變招擒拿手添, 呢幾招動作流暢, 有姿勢又有實際, 可得滿分呢:

毛毛棒被小肥貓咬住未能脫身, 裁判宣佈小肥貓勝:

友誼第一比賽第二, 剛才戰況激烈既兩位選手轉頭就攬頭攬頸玩埋一堆, 連頒獎禮都話唔出席啦喎:

小肥貓係優秀既運動健將, 唔同項目都積極參與, 切磋既對手除左毛毛棒之外, 仲包括不同款式既釣貓玩具, 假老鼠, 波波等! 佢仲係環保份子, 連廢紙球, 膠飲管, 甚至飲管套(紙包飲品外套住飲管果D)都玩得不亦樂乎! 

佢最鍾意將飲管套"擔"去房門口玩, 不過玩兩玩就會笨笨咁將套從門底推左入房, 撩極都撩唔返出黎, 要等我發現拎返先有得繼續玩.   如果我咁岩響房, 就會響門底推返出去俾小肥貓, 不過玩兩玩佢又會推左入黎, 試多幾次之後通常都係我厭麻煩, 沒收左佢算數!