與貓同眠

好多主人會同寵物一齊瞓覺, 小肥貓初黎時都有同我地瞓, 但果時佢未習慣新地方半夜會大叫搞到我地瞓唔到, 佢鍾意瞓床尾又容易俾我地踢到, 為左佢亦為我地好, 唯有唔俾佢入房! 不過響我心裏面, 一直都好渴望同小肥貓瞓架~

早排老公唔響香港, 機會終於黎啦!!

為左出呢個BLOG, 我仲專登幫小肥貓影左D床照添!!



第一張係臨熄燈前影, 小肥貓鍾意瞓床尾, 一入房已經霸左呢個位:

全晚佢都係瞓響咁上下位置, 有時近我D枕住我小腿, 有時就自己瞓!

天光偷影仲瞓緊既佢:

小肥貓係隻好乖好體貼既貓貓, 甚少騷擾主人瞓覺, 會等聽到我地醒左有聲先會叫. 一般我地8點左右俾早餐佢食, 假期瞓到9點幾10點先餵佢, 佢都唔會嘈.

入房瞓小肥貓亦好乖好定, 就算佢醒左, 只要我扮未醒唔同佢有EYE CONTACT, 佢都會由得我繼續瞓. 唔好彩俾佢發現我瞓醒, 佢就會走埋黎叫我.

仲會行上被上面搓下搓下:

小肥貓響我肚上面猛咁搓, 一路搓一路"咕", 我俾佢搓到想去廁所:

好彩佢轉左位置:

我影左一陣再瞓返, 小肥貓就行返床尾等.

呢張佢見我舉起相機, 即刻行埋黎叫我:

黎到又係一路搓一路"咕", 今次影到正面啦:

呢張側面大頭靚仔相我影得好辛苦, 佢成隻貓企上我心口到搓, 我爭D唞唔到氣呢:

望住叫極都冇反應既主人, 小肥貓冇晒辦法:

唯有返床尾再等過:

小肥貓話: "主人仲唔起身, 悶死貓啦!"

影呢輯VIDEO前其實我已經俾小肥貓入房瞓過幾次架啦, 所以會知道佢有咩舉動. 諗返第一次同小肥貓瞓係瞞住老公先斬後奏, 事後轆乾淨張床清理好現場, 見老公完全冇懷疑先忍唔住自爆!  黎緊老公應該唔使再出TRIP,  我同小肥貓亦冇乜機會再"偷情"啦!



溫馨小插曲:

老公一直唔太鍾意俾小肥貓入房, 覺得唔係咁衛生, 只不過佢唔響屋企都冇我符, 況且我一定會轆乾淨床被, 貓毛貓砂冇得留低, 佢都冇野可以投訴.

對上一次老公臨走, 我話今晚我同小肥貓瞓啦喎, 老公望下我, 又望下正LAM手LAM腳沖緊涼既小肥貓, 先做左個無你地咁好氣既表情, 然後同小肥貓講: 你記住沖乾淨D先呀!!!

宜家日頭我俾小肥貓入睡房, 老公都隻眼開隻眼閉了~~~

游乾水

小肥貓係隻超級跟尾貓, 主人去邊佢都跟到實, 連廁所都唔例外!   最初我唔俾佢跟入去, 佢就投訴到我出黎為止. 怕佢太嘈唯有放行, 佢真係即刻安靜晒, 仲會搵個唔影響主人既位置陪住主人.

小肥貓鍾意坐呢個位, 我擦牙洗面佢都響度望, 開鏡櫃就會伸個頭埋去八:

有時鍾意坐浴缸邊或馬桶蓋:

小肥貓加入呢個家庭快兩年啦, 入廁所陪主人都陪左好耐, 有個行為卻係近排先開始有, 就係行入浴缸:

以前佢從不踏進浴缸半步(唔知點解), 試過之後竟然即刻愛上左(都係唔知點解), 仲一入去就興奮地碌來碌去:

碌完一邊:

碌去第二邊:

發現被人偷影即刻好正經咁企返起身:

諗住佢會走, 點知坐返低:

忍唔住再碌過:

知我仲影緊呢:

突然一手拍埋浴缸邊好似想捉D野咁:

好警覺咁既樣, 其實乜野都冇:

繼續碌多陣:

發現我仲影緊! 小肥貓心諗: 我都表演左咁耐咯, 狗仔主人仲未影夠咩???

被狗仔主人搞到冇晒 mood, 索性企身走貓:

拍呢輯video既時候, 腦入面彈左個景象出黎, 係一條肥海豚在海中暢泳, 姿勢優美妙曼地邊游邊轉身, 我個腦仲彈左句"肥而不論盡"既comment添!  而現實就當然冇咁靚咁浪漫, 肥海豚係隻肥貓, 海中暢泳嘛......貼切D既描述就係乾塘浴缸游乾水囉!  兩個景象差咁遠, 我都好佩服自己既聯想力呢?!

自從發現左呢個好地方, 就算冇人入廁所, 間中小肥貓都會入浴缸碌兩下, 我偷偷行近, 仲會聽到佢碌地時將頭仔撞落浴缸既"咚咚"聲添, 睇黎佢真係好開心好high呀! 不過小肥貓唔會響入面逗留好耐, 佢係跟尾貓黎架嘛, 主人響外邊, 佢梗要貼到實呢~~