2009年2月21日 星期六

心痛

由去年9月尾到宜家, 小肥貓因為便便有血一直斷斷續續要食藥. 頭三個月食杜蟲藥情況一直冇改善, 今年初轉醫生先check到係結腸炎. 醫生話引致結腸炎最普遍原因係食物敏感, 建議小肥貓轉糧.

1月尾小肥貓開始轉食敏感糧(Royal Canin Sensitivity Control), 醫生仲開左14日抗生素俾佢. 呢次治療效果好明顯, 四日之後便便及抹patpat都已經冇血, 上星期覆診亦一切正常. 我同老公都好開心, 折騰左咁多個月, 小肥貓終於好返啦!

只可惜開心左冇耐, 前幾日情況又有變化, 小肥貓便便次數仍然係每日一次, 但就有肚瀉跡象, 連續幾日都係咁, 有次仲有少少血添. 我上網搵資料, 原來呢種症狀幾普遍, 食敏感糧都唔係百份百得, 唔少貓貓要轉好多款敏感糧先試到一隻岩, 真係幾煩惱!!

今朝打去診所報告小肥貓既情況, 醫生話要餓佢24小時, 俾佢d腸胃休息, 之後再餵返敏感糧睇下有冇好轉, 唔得就要再覆診或者轉糧.

小肥貓宜家正在禁食中, 仲有8個鐘先可以再食野. 本來我以為佢實嘈到拆天, 點知又唔係喎, 或者真係唔舒服冇乜胃口卦, 頭先佢嘔左兩灘白泡, 唔知係咪餓得濟. 見到佢咁樣我真係好心痛呀!!  小肥貓實在太可憐啦, 食咁耐藥都未好, 轉糧之後已經戒清晒零食, 我仲乘機同佢減肥添, 如果早知要禁食, 我就唔同佢減肥啦, 好後悔呀!!

下星期我有事要離開香港幾日, 希望佢快d好返啦, 唔係實擔心死我!



呢幅相係響診所影架, 小肥貓周圍望但唔敢行出黎:





呢幅係早兩個月影, 個身仲係圓碌碌:





呢幅係今日影, 瘦到d骨突晒出黎, 要改名"小瘦貓" 啦:





張貼者： 於
標籤：

12 則留言:

  1. fuk2009年2月21日 凌晨1:14

    my cat also has blood inside his "55" , dont worry too much, my friend said i might give too much protein to my cat, anyway I suggest you to visit OIC, Ms. So Ching Ching  has adviced some  supplement for my cat , which is quite ok lah....I know its very common for cat for have blood inside their 55, of course too much is not ok lah 
    [版主回覆02/22/2009 10:47:00]多謝你既意見呀~ 
    我聽過OIC但未去過, 我都想買d supplement俾小肥貓, 有人話益生菌對腸胃好, 等我去問下先~

    回覆刪除
  2. 貓咪之家2009年2月21日 中午12:20

    想問小肥貓係唔係由細到大便便都有血和屙爤屎架，有冇check個腎同肝呀
    [版主回覆02/22/2009 10:50:00]小肥貓黎左我度1個月我先發覺佢便便有血, 因為果次滴左出黎, 未黎之前有機會都有, 因為都試過見到地下有血, 但因為多貓, 以為佢地打交所以冇為意. 但佢d便便形狀就好正常, 一粒粒圓圓地咁, 屙爛係呢幾日開始先有.
    佢冇check過肝腎, 應該唔關事卦!!

    回覆刪除
  3. may2009年2月21日 下午2:09

    有無試過「蒸雞柳（胸肉）」俾小肥貓吃呀，貓界流傳可以醫腸胃敏感㗎！
    [版主回覆02/22/2009 10:54:00]我都聽過, 但問診所姑娘佢地卻話唔好, 所以我未試住. 禁食完之後我試餵一款貓糧俾小肥貓先, 唔ok再試雞柳或轉其他糧, 睇怕都有排試.....

    回覆刪除
  4. Mike Chan Mark Chan2009年2月21日 下午4:19

    便便血的問題實在困擾了 , 爸爸媽媽真幾心痛 !  
    [版主回覆02/22/2009 10:54:00]係呀, 好心痛架!! 係呢, 你d寶貝好返d未?

    回覆刪除
  5. 11282009年2月21日 下午6:18

    好擔心
     
    [版主回覆02/22/2009 10:56:00]雖然比起其他嚴重疾病, 貓貓食物敏感較為小兒科, 起碼佢唔會好唔舒服或冇精神, 不過知道佢有病, 真係會好擔心同心痛咯!

    回覆刪除
  6. 貓公主- 賴小姐2009年2月22日 凌晨12:22

    我家貓貓之前都係成日屙爛屎, 之後上網搵到資料話可以試蒸雞柳, 雞柳纖維可以令便便結實d
    貓貓食左幾個月,已明顯有好轉,唔會再有爛屎或帶血, 之於乾糧係食雅思, 幾過半年的嘗試,貓貓已進入健康狀況
    [版主回覆02/22/2009 11:00:00]咁即係宜家keep住每日食雅思及雞柳? 我宜家試緊隻敏感乾糧, 唔ok或者會試雞柳, 可能要慢慢逐隻試先得.
    我想問每試一種糧或食物, 要幾耐先知道係得定唔得架? 小肥貓食敏感糧頭兩星期都冇事, 跟住先屙爛便, 咁係咪即係話要試起碼兩星期呢?

    回覆刪除
  7. 貓公主- 賴小姐2009年2月22日 上午11:56

    我相信每次一種食物都需要耐心觀察, 都有因為同樣情況睇過醫生, 佢俾左d益生菌加落d糧到, 試左兩個星期都未見好轉,就開始上網搵資料,睇到blog 友講解雞柳食法幫助貓貓腸胃及便便, 就跟住去試
    首段時間, 只吃雞柳,  一日兩餐, 無乾糧,無零食, 呢個情況先至可以觀察到雞柳的作用
    起碼兩個星期, 見情況好轉穩定, 就開始俾番乾糧, 睇左好耐就選雅思,
    再過兩星期都無再糊便便, 就決定繼續,
    發展至依家都有半年, 現時係雞柳加小糧mon petit, 早晚一次, 情況良好,
    我都係以過來人心情來同你分享, 其實你都可以試下, 觀察下, 一定搵到方法解決
     
    [版主回覆02/22/2009 19:05:00]似乎雞柳真係有效喎, 咁我諗如果乾糧試左唔得, 我會幫佢試雞柳先, 唔使佢腸胃咁辛苦.
    多謝你既意見呀~~

    回覆刪除
  8. 馬莎2009年2月22日 晚上10:29

    蘇菁菁有本叫"貓貓食得天然"架
    我有"狗"版本, 我覺得對寵物飲食有幫助, 公共圖書館有得借.....希望小肥喵快d好返啦~ 唔掂又試下轉醫生???
    [版主回覆02/26/2009 22:27:00]等我去圖書館摷下先, 響書局好似唔覺有!
    我唔諗住再帶佢睇醫生住啦, 醫生都只會係建議試第二隻糧, 我唔想再令小肥貓擔驚受怕呢! 不過當然我會一路睇實佢情況啦~~

    回覆刪除
  9. dickey2009年2月22日 晚上11:24

    陰公....小肥貓廋晒.... 如果你想去OIC..你要留意wor..佢地搬咗啦...不過都係喺舊址附近...你最好打個電話check check佢地邊日開同開幾點先好去呀..希望小肥貓快d好番晒啦... OIC新址:
    O.I.C. Pet Wellness Center Rm. 1106, Easter Ctr., 1065 King's Road Taikoo, Hong Kong. t  2561 7788  
    [版主回覆02/26/2009 23:26:00]其實我都未去過OIC, 連佢響邊區都唔知, 有你俾既資料就方便好多啦! 多謝晒~~

    回覆刪除
  10. Laura Lam2009年2月25日 上午10:57

    "小白" 都系腸胃敏感o既肥貓。 重系無 la la suddenly 腸胃敏感，連平時食開o既糧都突然唔ok. 搵到又要驗血，又要check 好多o野。 but 哀妹過左 6 歲就好 d la，無咁多o野嚇我。 醫生話 d 純種貓系咁架 la! 由其系果 d 過度繁殖出黎o既， 抗菌力比較低，比較敏感。 so, 要好有心機養。
    [版主回覆02/26/2009 23:31:00]腸胃敏感真係幾麻煩, 由食開ok變唔得就仲更加無奈!! 我一定會俾心機幫小肥貓試, 幫佢搵到岩食既糧架!!
    過6歲就好d, 會唔會係大左抵抗力強左呢! 希望大家既貓貓都健健康康, 生活愉快啦!

    回覆刪除
  11. Joanne2009年2月26日 上午9:30

    真係慘囉! 不過小肥貓都好乖喎, 冇扭計要食野, 希望佢好快好返冇事喇, 祝小肥貓早日康復, 健健康康, 日日都有靚屎痾~

    [版主回覆02/26/2009 23:42:00]小肥貓真係好乖架, 所以我更加心痛佢呢!
    多謝你既祝福, 希望大家既貓貓都健康成長, 生活無憂~~

    回覆刪除
  12. 豬皮蘿白MAY2009年2月28日 下午3:49

    希望佢快D好番囉!
    [版主回覆03/01/2009 22:19:00]多謝晒~

    回覆刪除

訂閱： 張貼留言 (Atom)