究竟肥不肥

養左小肥貓不經不覺已經年半有多, 見過小肥貓(真貓/相片)既朋友, 十個有九個半第一句都係話: 嘩~ 隻貓好肥呀!!   經常見到佢既朋友, 好多亦會話: 嘩~ 佢好似又肥左喎!!

小肥貓究竟係咪肥, 我呢個主人都唔識判斷, 同老公既意見亦有d出入! 最奇既係我地兩個各自既立場亦搖擺不定, 即係有時我話小肥貓肥老公話佢瘦, 過一排我話佢瘦老公卻話肥!



話小肥貓肥既理由:

1. 一望就覺得佢肥啦!(好直接)

2. 佢塊面咁闊, 個身又圓碌碌, 肚腩又dum左落黎, 仲唔係肥! (好有理據)

3. 貓點會有咁肥架? 佢肥到都唔似貓! (一般貓又多數係冇咁豐滿既 )



為小肥貓辯護, 証明佢唔肥(或唔算好肥)既理由:

1. 英國短毛貓係大種貓, 骨架本身粗大, 點可以同家貓比喎!(咁又係 )

2. 書到話睇貓肥唔肥係當佢行緊或企定時睇佢個身有冇響中間闊左出黎

    "(  )" 就係肥; "││"就係唔肥. 小肥貓係後者! (無超標呢 )

3. 書到話只要摸貓貓胸口位置摸到肋骨就唔係肥, 我摸到小肥貓d肋骨架喎!

    (實摸到既, 爭在大力定細力摸囉 )

4. 帶小肥貓睇醫生時問過使唔使減肥, 醫生話唔使, 不過唔好再肥!

    (即係勉強可以叫做唔肥 )



小肥貓體重大約11磅, 每日食三餐, 份量亦唔算多:

我成日諗小肥貓會唔會唔夠飽, 因為佢每時每刻都好想食野, 一見到野食就好猴擒, 連我拎粒糖食佢都唔放過想lam兩下! 我曾經為左要測試佢既食量, 試過俾6湯匙乾糧佢都可以狂風掃落葉咁唔停口食晒!   宜家佢每餐既份量大概係1湯匙濕糧加1.5至2湯匙乾糧(平匙), 小肥貓好乖唔會嘈唔夠食, 直至就快到下一餐時佢先會提醒我, 朝早果餐如果遲唔超過一小時佢都好乖唔會嘈住我地瞓, 咁又係咪代表呢個份量其實佢都夠飽呢?

早排天氣凍, 我刻意俾多左份量, 佢個身即刻圓左漲左, 暖返d我又減d, 但查實應該餵幾多, 我都係估估下!

為左解答肥與肥唔呢個謎團, 我搵左小肥貓唔同角度影既相, 請大家幫忙判斷一下.



正面照:

側面:

另一面:

貼地:

企響度:

由上面影:

龜Sit:

晒肚沖涼:

最後呢張唔係貓, 係乳豬 :

請各位俾d意見啦!! 無言感激~~