病從口入

(溫馨提示: 以下內容及照片可能令人不安, 敬請留意! )


小肥貓超級為食大部份睇開呢個blog既朋友都知, 佢見到鍾意食既野會不擇手段飛摛大咬, 而且仲好有毅力! 

響入正題之前, 有興趣回顧為食貓趣事又或者未熟悉小肥貓既朋友可以先瀏覽以下兩篇:

飛摛大咬篇: http://littlefatfatcat.blogspot.hk/2009/07/blog-post.html

不擇手段篇: http://littlefatfatcat.blogspot.hk/2009/10/blog-post.html

雖然小肥貓對鍾意既食物好瘋狂, 但其實佢食野非常小心謹慎, 成兜糧入面埋粒好細粒藥丸或加一兩滴藥水佢都唔肯掂. 有時我地食野佢行埋黎八, 好認真咁聞完一輪, 無興趣就唔會再哄埋黎, 更加唔會隨便試味! 而要數佢最叻仔一次就係鮮奶事件啦!

小肥貓同主人一樣鍾意飲奶, 每朝主人飲佢都嘈住要, 為左tum佢唔想令佢失望, 主人多數會分幾滴俾佢lam下.  主人只like飲純鮮奶, 牌子就無所謂, 小肥貓亦唔揀擇, 隻隻都飲得好開心. 不過唔知點解佢陸續對飲開既牌子抗拒, 最後只肯飲十字牌, 為左迎合小肥貓口味我亦只買呢款. 點知後來佢連十字牌都唔飲, 連續幾日掂都唔掂, 明明望到主人拎盒奶出黎時興奮到又叫又企高, 俾佢飲果時佢卻望住隻碗好無奈咁款!  正當我慨嘆緊貓既喜好真飄忽, 發愁第日唔知買咩鮮奶好既時候, 就睇到報紙話十字牌鮮奶有異味要回收! 我諗好可能小肥貓已經先一步察覺所以先唔肯飲~

由於小肥貓對食一向小心, 我地只需將食物收好, 亦無擔心過佢會出事~

點知上星期意外發生了!

有朝老公起身發現地下有兩小撻白泡, 我地意識到小肥貓可能有唔舒服, 見佢仍然好好胃口又無其他唔妥, 都不太擔心~

同日黃昏我響房出黎又見到地下有兩撻仔嘔吐物, 呢次係白泡夾雜少少深色物體, 似係未消化既貓糧!  我即時諗會唔會係d糧有問題呢? 係咪濕糧變壞左我唔察覺呢? 見小肥貓依然龍精虎猛八卦兼好胃口, 我諗住可以再觀察下.

果晚我淨係餵乾糧小肥貓食, 佢好快食清光然後好滿足咁沖涼, 行為同平日差不多無乜異樣. 點知第二朝老公起身, 一出廳就入返房同我講小肥貓好似病得嚴重左, 佢又嘔左三撻, 呢次唔再係白泡而係深色一堆堆野! 

我地諗住即刻帶佢睇醫生, 而就響清理嘔吐物既時候我地發現左:

原來有條長膠條響入面!

我地認得條膠條係樽裝食品既封條, 係之前我地俾小肥貓玩架! 小肥貓對飲筒, 膠條, 牙籤, 幼繩呢d野特別有興趣, 一見到就會搶走玩, 又抓又咬又撲又追咁玩得好不興奮.  我地見佢玩得開心亦無制止, 有時仲專登留俾佢, 等佢玩夠本先執走~ 果次佢玩條膠條時, 我地仲笑佢咬到sap sap聲好似食薯片添! 之後亦無為意膠條唔見左, 直至佢嘔返出黎先知.

雖然小肥貓嘔得比之前嚴重, 但嘔左條膠條出黎我同老公即刻放心好多, 剛好當日上午小肥貓要接受BICOM治療, 我地決定唔帶佢睇醫生住, 做左treatment 聽下治療師點講先~


每次治療儀器都會先檢查小肥貓身體狀況, 治療師亦會問我小肥貓一星期以黎情形, 一般我都會如實作答, 不過果朝就刻意保持神秘. 我請治療師先做檢查, 睇下儀器check得準唔準, 我再開估小肥貓有咩唔妥.  結果測出小肥貓胃同胰臟有問題, 仲係急性添!

小肥貓好乖好合作地接受治療:

每次主人都會響旁邊陪住:

果次小肥貓做左三個針對胃部既治療:

亦做左胰臟同排毒既program~

可愛既小下巴~

好relax啊~

想睡了:

治療完左機都熄埋, 小肥貓仲唔捨得走呢:

當日完成治療之後小肥貓都仲嘔左一次, 應該係個胃仲有唔舒服, 我聽治療師建議讓小肥貓禁食一餐, 之後幾餐食清蒸雞柳清下腸胃, 一路就無再嘔啦~

前兩日再做治療, 小肥貓胃同胰臟都好健康呢!  


治療前影既相, 好似若有所思咁:

Facial 瘦面?

主人同小肥貓合照, 小肥貓似被脅持!

小肥貓宜家無事好返晒了, 不過經過今次教訓, 我同老公都唔會再俾膠條或類似物品佢玩架啦, 否則佢一時大意吞左受苦就慘啦!