紙箱裏的肥貓

好多貓貓愛玩紙箱, 鍾意響又逼又窄既箱入面瞓. 我想試下小肥貓對紙箱有冇興趣, 請老公拎左個返黎.

小肥貓第一次見呢個A4紙箱冇乜反應, 過左陣先行近望, 跟住就坐左入去:

佢好想瞓入去, 但卻好似唔知點瞓好, 有d唔自然:

下面幾張相佢不停試來試去, 想搵個舒服d既姿勢.

邊試邊托大腳沖涼:

塞左個頭落去, 隻腳塞唔入:

將個頭塞過D, 隻腳仍然係塞唔入:

仲連隻手都跌埋出去, 唔知點算好:

終於試到個舒服既姿勢啦:

其實個紙箱對小肥貓黎講真係窄左少少, 難怪佢塞得咁辛苦. 由呢個角度睇佢背脊突左好大舊出黎呢:

小肥貓比較鍾意瞓箱蓋, 間中亦會跳入箱身, 呢個時候如果我搞佢, 佢就會當我係入侵佢領土既外敵咁出手反擊:

撲上黎出手又出口:

個樣好惡, 不過佢冇出爪, 咬我都係細細力架咋:

我唔搞佢佢就靜靜地坐:

難得影到佢有少少笑容呢:

呢個紙箱小肥貓除左入去瞓之外, 仲自創左好多新玩法, 例如連續跳入箱蓋箱身再跳返出黎(通常我將兩部份放得好近); 又或者衝行跳入箱蓋, 令箱蓋向前滑行, 佢就好似坐滑板咁跟住"扇"; 而當佢唔知係無聊定興奮既時候, 仲會一啖啖咁咬個紙箱邊添! 上面輯相係拎紙箱返黎頭兩日影既, 宜家箱邊已經俾小肥貓咬到一忽忽, 還好整體結構仲好實淨, 應該仲可以捱到一段日子~ 

妨礙工作

前兩日響餐檯做野, 小肥貓陪我跳埋上黎,  見佢咁痴我咁有心又瞓得咁可愛, 都唔捨得即刻趕開佢:

佢趴響度我做唔到野, 唯有先出軟功, 摸下佢搞下佢, 令佢縮開少少:

過多陣再推佢坐過D:

不過唔夠一分鍾佢又痴返埋黎, 仲擺返開頭個pose添:

我再次出招, 推佢坐開D:

以前唔識技巧, 我會夾硬抱或推小肥貓, 佢唔鍾意就出手拍我或者咬我, 後來發覺用工具幫手容易好多, 佢亦唔會反抗:

又係唔夠一分鐘, 佢又坐返埋黎, 呢次我怕左佢, 拎開本書算數:

我響檯底做野, 佢響檯面攤抖, 都唔知邊個先係主人呢:

其實好多時我響餐檯做野, 小肥貓都會跟埋黎, "擇"住我做緊既野, 明明張檯仲有大把位都係咁. 不過佢好乖, 一般只係攤響度睇住我做野, 除非我轉筆, 或者檯面有擦膠, 先會忍唔住伸手撥, 所以我寫字動作會盡量細D, 亦會拎開擦膠呢類容易引佢注意既小物件, 費事佢搞搞震~ 而如果佢真係唔聽話, 我拉多張餐椅響旁邊俾佢坐, 佢就會好乖好定架啦~ 

有小肥貓陪住做野確係好開心既事呢!

午睡的時候

好耐冇update個blog啦, 暑假係超級唔得閒既日子, 主要係工作忙左同自己報讀左d summer courses, 再加埋d日常事務, 時間排到滿晒, 夜晚唔夠瞓, 日頭又無精神! 呢段期間我一有空檔就會爭取時間休息, 半個鐘又好, 十分鐘都好, 小睡一陣當充下電.

小肥貓好乖, 好多時我休息佢都會過黎陪我, 有時伏響梳化另一邊, 有時響旁邊地上, 有時更會挨住我瞓添.

影呢輯相果次佢跳上黎冇即刻瞓, 而係開始沖涼!

先清潔隻手:

跟住lam大脾(好羡慕佢既軟骨功):

托實隻大脾先:

睇書話貓貓沖涼一般係由頭至尾由上至下有次序咁沖, 小肥貓卻鍾意沖腳先,

細心地清潔腳趾, 又lam又咬搞左好耐:

個樣幾咁認真:

小肥貓突然發覺被人偷拍, 呆左一下(當時呢個pose真係定左一陣, 隻腳凌空舉住):

仲繼唔繼續沖好呢? 諗下先:

都係瞓覺穩陣d:

忙碌既日子中, 對小肥貓既照顧亦自覺疏忽左, 雖然一日三餐唔會少(佢會提我, 俾少d都唔會放過我), 但就甚少陪佢玩. 好唔容易佢等我響屋企忙完, 轉頭我又要出去, 每次關門前望住佢目送我離開個樣, 都會好唔捨得同內疚~

最近工作時間鬆動返d, 可以有多d時間陪佢啦, 不過小睡既習慣我無戒到, 一來瞓多d精神d, 二來有小肥貓陪住小睡, 真係一件好窩心幸福既事呢~~~