新貓床

前幾日天氣突然轉涼, 好在天文台一早預告, 等我可以抽時間買張新床仔俾小肥貓~

舊年第一次買貓床經驗不足, 買既係花巧型:

SIZE窄左少少, 只係剛剛包到小肥貓:

想睇返舊年貓床試用過程, 可以去呢度:

http://littlefatfatcat.blogspot.hk/2009/11/blog-post.html

今年買既貓床改為實用型:

小肥貓第一次見新貓床, 我照舊出零食呢一招, 等佢對新床仔有好感:

唔知係咪有少少緊張呢, 只係伸長條頸望:

跳上去聞下先:

好似裝緊裏面仲有冇零食咁:

呢張小肥貓響張床度搓下搓下:

越搓越入:

終於瞓左入去啦:

今次新床啟用儀式好順利, 由放零食到小肥貓瞓入去只係用左一分幾鐘! 我見佢咁醒目諗住獎多兩粒零食俾佢, 點知反而引返隻為食貓出黎!

眼定定望住我手上零食既三腳貓:

差D咬埋我隻手指:

望到眼都唔眨:

食完要企高檢查下我仲有冇收埋呢:

連我拎過零食既手指都唔放過:

食完零食笑笑口咁入去攤抖啦:

望下床頂企唔企理, 頂唔頂得住冷氣機漏水先:

張新床仔軟綿綿又舒服又闊落, 小肥貓好快愛上左, 得閒就會入去休息, 同之前用頂帽一樣, 夜晚我地同佢講瞓覺啦, 佢都識自己埋位:

zzzzzzzzzzzzz.......:

呢張床仔可以擺落機洗, 內籠清潔(除毛)亦好方便, 應該會"COME"用好多~

不過見小肥貓用新床仔用得咁開心, 我不其然成日諗.......下次買咩新款俾佢試好呢?

玩手指

"玩手指"係小肥貓同主人經常進行既活動, 係一種有益身心既互動遊戲!

響遊戲正式開始之前, 雙方必須先進入狀態, 方法就係摸貓啦!!

小肥貓好鍾意俾主人摸, 一摸就會瞓低反肚. 佢最ENJOY係摸頭仔同下巴, 肚仔就一時時, 心情好俾主人摸幾下, 心情唔好會撥開主人隻手, 再摸就咬架啦~

主人摸佢下巴:

一邊摸佢一邊"咕"得好大聲架:

當主人摸小肥貓對手, 遊戲就正式開始, 小肥貓會反過黎捉住主人D手指又咬又LAM:

仲會咬同LAM主人唔同手指添:

不過小肥貓確係好乖, 唔會咬得大力~ 可能佢諗住幫主人清潔, 好似佢平時又LAM又咬自己D手指咁啩~ 



玩完一輪發現主人影緊佢:

想主人繼續同佢玩呢:

話明互動嘛, 頭先係小肥貓玩主人手指, 下面就輪到主人玩佢手指, 仲用指甲鉗同佢玩添:

目的好明顯, 就係要檢查佢D指甲, 見有長既就剪:

玩下玩下好快剪左幾隻長指甲, 轉個身小肥貓仲瞓埋添:

主人想影過少少架, 不過費事張相變三級照咋:

瞓瞓下收起手仔, 真係好想錫落佢到呢:

初頭幫小肥貓剪指甲簡直係十級難度, 雖然睇過朋友及佢位靚貓模親身示範, 但當日位貓模實在太乖, 全程坐定定零掙扎, 唔似小肥貓咁又咬又踢, 我地TUM過鬧過出埋零食都搞佢唔掂!  有次靈機一觸用玩手指呢個方法, 小肥貓以為我同佢玩不但唔會掙扎, 仲一路剪一路係咁"咕", 宜家見我拎起指甲鉗, 仲會自動跳上梳化反肚準備添! 

無無聊聊

最近小肥貓既生活冇乜特別精彩既地方, 主人又冇買新野俾佢玩, 所以今次出BLOG都諗唔到咩主題, D相亦只係響小肥貓平日無無聊聊時, 主人無無聊聊地幫佢影既~



呢個箱係放吸塵機架, 原裝既紙盒晨早俾小肥貓玩爛左! 每次我拎吸塵機, 佢就會九秒九入去霸位:

呢張影得靚仔D:

平時小肥貓鍾意響窗台攤抖:

張相影到佢圓碌碌連對腳仔都短左咁, 其實佢12磅, 英短黎講唔算好重架咋~



小肥貓鍾意陪主人用廁所, 主人朝早梳洗佢就響度等:

開始無聊想恰眼瞓:

準備好個舒服D既瞓覺姿勢:

可惜主人響度搞呢樣搞果樣, 佢想瞓都瞓唔到呢:

呢張係主人響廚房準備晚餐時幫小肥貓影架, 佢好乖咁響門口陪住:

睇真D佢對手仔:

佢著住我隻拖鞋呢~~

小肥貓響廚房門口等既時候, 好鍾意"責"住我地既拖鞋, 有時枕住黎瞓, 有時搭住半隻, 亦試過穿隻手仔入去, 但兩隻手仔一齊穿就未試過, 仲穿得咁整齊添!  不過有時佢都會發下傻, 將拖鞋當玩具咁又咬又踢, 玩到母雷公咁遠, 結果梗係博得主人既懲罰.......就係被主人捉住狂抽水啦~~