大踢爆

寫左小肥貓BLOG咁耐, 多數都係講小肥貓點乖點可愛, 但事實上佢都有好多不良紀錄, 就等我一次過將佢D曳野, 搞破壞既所作所為爆出黎啦!

小肥貓好鍾意咬野, 特別係棒狀物體.

所以呢個抓抓板佢玩得好開心:

不過響主人注意唔到既時候, 其他岩咀型既野佢都一樣咬得好開心!



放響檯面既暖水壺, 壺咀俾小肥貓咬到花晒:

紙拖把"棟"響洗手間牆邊佢都有本事咬到:

雨傘亦係小肥貓至愛, 初時唔知佢鍾意咬野, 將濕雨傘放響廳晾, 收起時摸到手柄岩岩杉杉, 先發覺已經佈滿牙印.



有次同老公買左支飲品:

飲品放左入雪櫃, 飲管(有膠套包住)就隨手放響餐檯. 到第二日飲果時, 老公奇怪點解支飲管好似漏氣, 啜極都啜唔到既?!

掹返出黎一睇:

原來已經俾小肥貓咬到穿晒窿!

由於無料到咁既情況, 我同老公都覺得好好笑呢~



小肥貓鍾意咬既仲有鮮花:

佢係摧花能手黎架.



其他遭到毒手/毒口既物件仲包括喇叭電線:

五隻喇叭其中三隻電線已經甩左, 駁完好快又甩返, 我地見部HI-FI唔多用, 索性費事再駁, 將喇叭塞晒去電視後面就算!



影呢幾張相係諗住講喇叭線, 當時仍未發覺仲有樣野遭遇不測 :

就係呢粒野啦:

睇黎第日冇人響屋企或者夜晚瞓覺時, 都要熄晒電視掣先得啦!



小肥貓鍾意響窗台休息:

同一個位置, 窗簾已經唔見左啦:

有次小肥貓指甲勾到窗簾布, 佢唔識縮返出黎只係用力扯, 我未趕得切去解救, 窗簾布連條軌已被佢由牆上扯左一段出黎! 條軌鬆左又彎左, 承受唔起窗簾布重量, 我地又怕小肥貓再勾到整親, 於是又費事裝啦!



小肥貓樣靚身材正唔怕被偷窺, 無遮無掩一樣瞓得豪邁:

仲有一樣破壞唔知應唔應該入小肥貓數!

佢有時會坐響PRINTER上面:

我見佢乖乖地定定地通常都唔會趕佢走.

不過對上一次我揭開PRINTER蓋換墨時發覺個骹位壞左, 之後再唔能夠完全合上, 宜家要用部機就要大力按實個骹位, 否則會出ERROR! 唔知係咪小肥貓重得濟壓壞左呢~



睇下佢, 又有鬼主意啦!

對住呢隻古靈精怪既八卦貓, 真係睇少一眼都唔得呢!

親善大使

以前我對貓既認識好膚淺, 以為貓高竇唔睬人, 唔聽命令, 我行我素. 幾年前開始同貓多D接觸, 先知原來貓都幾友善, 會親近人, 明白人既說話.

到養左小肥貓, 更發覺貓既性格竟然可以好“狗”-----  小肥貓就好似狗狗一樣咁痴人, 鍾意跟出跟入, 好動又八卦, 甚至會幫忙招待客人添~  

佢係屋企既親善大使黎架!

小肥貓唔怕陌生人, 初次見面既客人摸佢撩佢玩佢都唔會抗拒, 會主動挨向客人示好, 或者響地下碌來碌去. 就算主人唔響身邊, 小肥貓都唔會冷落客人, 客人撩佢玩佢會走近, 仲試過好嗲咁挨住客人, tum得客人好歡喜添!



小肥貓挨住客人坐:

有時小肥貓怕客人悶, 會表演節目娛樂下. 佢最拿手既項目就係即興搞搞震, 例如八卦客人帶來既物品, 裝人地紙袋裏面袋左乜野, 更會忍唔住出手搞/咬客人衣物或手袋上既拉鏈扣, 小吊飾等! 好彩小肥貓都算聽話, 只要客人叫住佢或輕輕擋開佢, 佢都會立即停止.



小肥貓八卦袋入面既野:

有客人又發現出動某D“道具”可以令小肥貓做升級表演.

例如有客人用公仔鎖匙扣引小肥貓, 小肥貓係咁追住要玩; 有客人俾條絲帶佢, 佢玩到碌來碌去又爪又咬; 有客人肚餓拎餅仔出黎食, 小肥貓竟然老實不客氣地企上人地大脾, 想人分D俾佢食!  呢D都係客人事後講返俾我知, 好彩佢地講既時候都仲係好好笑咁, 唔似覺得小肥貓麻煩失禮咋!



小肥貓好鍾意玩呢類小玩具, 自己一個都玩得好投入好開心:

下面三張相要多謝客人友情客串:

睇唔睇到小肥貓想做乜?

佢要玩鞋帶呀!!!

出口又出手添:

呢張就係舊相, 示範佢點樣企響人地大脾睇人食野:

相中人係老公, 不過小肥貓對住有食物在手既客人亦一樣係咁勇往直前呢!



客人之中當然亦有怕貓既, 有一位幼稚園小朋友一見到小肥貓就驚, 要我抱起小肥貓先敢入屋, 亦有大人唔敢留響廳度同小肥貓單獨相處. 不過隨著日子過去, 客人都知道小肥貓其實好溫和, 加上我教左佢地一D防小肥貓近身既招數, 好快佢地已經唔再怕, 果位小朋友亦敢快步從小肥貓身邊行過, 仲夠膽響我抱住小肥貓時細細力摸佢添. 

小肥貓已經係屋企重要既一份子, 好多時小朋友入屋第一件事唔係同開門既我打招呼, 而係周圍搵小肥貓響邊, 望到小肥貓先安心. 有小朋友話小肥貓係佢最鍾意既寵物, 要攞小肥貓返屋企養.  更有唔少客人同我講, 話仔女(幼稚園至中學生都有)成日提住要養貓. 有一位後來真係養左兩隻英國短毛貓, 其中一隻仲同小肥貓一樣係啡虎紋毛色添!