恭賀新禧

恭喜發財!!!

小肥貓代表主人祝大家虎年行大運~ 萬事勝意~ 身體健康~ 工作順利~ 財源廣進~ 青春常駐~ 心想事成~

祝貓貓們食得玩得~ 冇病冇痛~ 日日都咁開心~ 



拜完年等我介紹下張相既製作花絮啦~

件衫仔係主人逛街見到貪得意買架, 係咪好有過年FEEL呢? 不過就似乎窄左少少:

我唔知其他貓貓著衫易唔易, 同小肥貓著就非常EASY, 因為佢只要有野食就任搞唔嬲! 之前連披件衫響佢背脊都強烈反抗架!

小肥貓著住件衫硬晒呔, "丫下丫下"咁行左兩步就唔識郁:

我拎走佢身下面既拖鞋, 佢都係一樣姿勢, 係個頭郁左咋:

老公抱佢都唔識反抗, 唔知點算好:

放佢響梳化影左張稍為企理既:

好快佢就擰轉身想咬甩件衫:

之後小肥貓跳返落地, 行兩步就撻響地碌兩下, 千方百計要整甩件衫:

碌到入櫃底:

件衫仔小肥貓著左唔夠五分鐘, 我見佢咁唔習慣, 相又影過, 就請佢食多幾粒貓糧, 幫佢除左件衫啦~

摧花小子

我同老公都唔係特別鍾意植物既人, 屋企冇種植物, 亦甚少插花. 養貓之後就更加唔使諗, 皆因小肥貓係摧花能手!

呢束咁靚既黃玫瑰係舊年生日收架:

小肥貓一見到D花就即刻跳上枱, 我唔俾佢行近, 佢扮晒乖咁坐響度:

點知忍唔夠幾分鐘, 就開始圖謀不軌:

(下面幾張相係由VIDEO CUT出黎, 光線同前兩張唔同)

張口咬:

仲扯D葉添:

我即刻鬧鬼佢, 佢匿左落櫃底, 個樣完全唔覺得自己做錯:

為左保護D花免遭毒口, 我唯有將花瓶放入書房, 真係委屈左D花啦!

摧花案仲有第二單!

舊年除夕我同老公出席朋友婚宴兼倒數PARTY, 拎左支玫瑰返屋企, 呢次我(懶)醒目, 冇俾小肥貓見到, 一入屋就放入廚房一角, 諗住好安全!

我冇關廚房門, 間中望下見支花好地地, 亦唔覺小肥貓有異樣, 但行近睇, 原來已遭遇不測:

咬到一岩一忽:

葉都唔放過:

我見支花傷成咁, 索性要黎引小肥貓, 睇佢究竟點咬法!

原來佢企上個電飯煲度呢:

我篤下小肥貓大脾, 佢發現事敗拿拿聲擰返轉面, 眼光仍跟住D花(我拎開緊), 仲忍唔住LAM LAM脷添:

之後扮到若無其事咁:

可憐支玫瑰剩返半朵咋:

壯烈犧牲:

有過兩次經驗, 我好肯定屋企真係唔能夠存放任何植物, 老公大可以大條道理唔送花, 過年亦慳返唔使買年花啦!!

抓抓板

早排送左份禮物俾小肥貓, 係個新既抓抓板:

呢個嚴格黎講唔係"板", 又唔算係貓樹, 叫"抓抓柱"又好似怪左D, 都唔知點叫好, 唯有叫返"抓抓板"啦~

小肥貓好鍾意粗麻繩"翹"成既抓抓板, 試過俾紙皮製或木製抓抓板佢玩, 反應都係一般. 麻繩既佢見到就好興奮, 行過總會抓兩下, 仲鍾意當玩具咁玩同咬.

呢個係同小肥貓一齊搬黎既, 一個月唔夠玩成咁:

呢款放低唔夠五分鍾就俾佢咬鬆左條繩:

佢似乎將"抓抓板"當成"咬咬板":

呢款係朋友送俾小肥貓架, 佢玩得好興奮:

不過兩下手勢就整甩左個波波啦:

之後變左踢足球:

今次又有新款啦, 小肥貓一見到即刻攬住呢:

玩得好投入:

無幾耐開始瘋狂:

一路玩一路咬:

起勢咁咬:

我見上次個波波咁易甩, 預左呢次四個波波亦會好快甩晒, 四枝棍分分鐘都會俾小肥貓拆埋出黎, 不過出乎意料之外, 呢款抓抓板非常結實, 玩左大半個月D波波仲好齊全, 麻繩亦冇乜點鬆, 睇黎應該幾"come"玩呢~