無無聊聊

最近小肥貓既生活冇乜特別精彩既地方, 主人又冇買新野俾佢玩, 所以今次出BLOG都諗唔到咩主題, D相亦只係響小肥貓平日無無聊聊時, 主人無無聊聊地幫佢影既~



呢個箱係放吸塵機架, 原裝既紙盒晨早俾小肥貓玩爛左! 每次我拎吸塵機, 佢就會九秒九入去霸位:

呢張影得靚仔D:

平時小肥貓鍾意響窗台攤抖:

張相影到佢圓碌碌連對腳仔都短左咁, 其實佢12磅, 英短黎講唔算好重架咋~



小肥貓鍾意陪主人用廁所, 主人朝早梳洗佢就響度等:

開始無聊想恰眼瞓:

準備好個舒服D既瞓覺姿勢:

可惜主人響度搞呢樣搞果樣, 佢想瞓都瞓唔到呢:

呢張係主人響廚房準備晚餐時幫小肥貓影架, 佢好乖咁響門口陪住:

睇真D佢對手仔:

佢著住我隻拖鞋呢~~

小肥貓響廚房門口等既時候, 好鍾意"責"住我地既拖鞋, 有時枕住黎瞓, 有時搭住半隻, 亦試過穿隻手仔入去, 但兩隻手仔一齊穿就未試過, 仲穿得咁整齊添!  不過有時佢都會發下傻, 將拖鞋當玩具咁又咬又踢, 玩到母雷公咁遠, 結果梗係博得主人既懲罰.......就係被主人捉住狂抽水啦~~ 

熨衫板上的小肥貓

多數既星期日晚, 都係我同老公一邊睇電視一邊熨衫既時間.

熨衫原本係一個人可以HANDLE既工作, 有小肥貓就變左兩個人既事, 其中一人專責睇實佢, 隻傻貓見熨斗電線郁郁下以為有得玩, 試過走埋黎又抓又咬, 鬧過幾次之後佢唔敢啦, 不過我地都怕一下留意唔到, 小肥貓唔知危險走近八卦, "辣"親就大件事!

有次熨完衫冇收熨衫板, 第二朝小肥貓食飽跳上去坐:

望住鏡頭個樣傻更更:

換左個姿勢有型返少少:

好似隻老虎仔:

後面睇都好吸引丫:

呢個甫士就騎呢左D:

唔知做乜無端端飛機耳:

食飽梗係要沖下涼:

呢張熨衫板唔係好穩陣架咋, 小肥貓又有返咁上下份量, 影完相我都拿拿聲趕返佢落梳化, 收好熨衫板了!

其實除左頭幾次小肥貓有搞熨斗電線之外, 後來佢一直都好乖好定, 我地熨衫佢就大覺瞓, 響梳化睇電視攤抖亦唔會騷擾, 不過我同老公都係照舊一人熨衫一人把關, 一來唔怕一萬至怕萬一, 二來一邊熨衫一邊有人陪住睇電視傾下計, 有人幫忙斟下茶遞下生果, 苦悶既家務亦會變得有多點支持, 多點樂趣呢~

盆中貓

客廳分體冷氣機早排開開下漏水, 我地舖左膠檯布同放左個盆響上面, 小肥貓一見個盆就急不及待跳左入去!



個盆size剛剛好 :

小肥貓鍾意LONG住頭仔瞓, 傻更更既可愛樣子令主人好想錫佢一啖:

膠檯布被風扇吹郁, 隻傻貓就跳出黎抓住又咬又LAM :

見我一路影住佢就扮乖, 坐返正經少少 :

小肥貓唔鍾意影相, 望到鏡頭會擰歪面, 我要用手引佢, 先影到四正D既相. 不過佢好醒, 攤響度郁都唔郁, 主人影左一陣唯有放棄, 由得佢繼續攤 :

呢個盆小肥貓見慣見熟, 平時洗衫都會放響窗台, 不過好多時我會專登放D衣架入去等佢瞓唔到, 因為有時佢唔只入去瞓, 仲會衝來衝去跳出跳入, 將個盆周圍撞, 玩到好HIGH架!

搵返小肥貓一年多前既舊相, 當時係佢第一次做盆中貓, 坐左好耐:

唔知心理作用定光線問題, 以前既小肥貓坐得似乎鬆動D :

鍾意LONG住頭仔既習慣就冇變 :

後記:

陪伴左小肥貓大半年既聖誕帽響呢次冷氣漏水事件中壯烈犧牲!  亦係多得頂聖誕帽吸左大部份水, 梳化先冇濕得咁厲害!

小肥貓非常鍾意呢頂帽, 大熱天時佢都仍然每日走入去瞓, 開冷氣佢瞓耐D, 就算冇開冷氣佢都會入去, 瞓左一陣覺得熱再出黎, 過一陣又入返去! 夜晚我地同佢講熄燈啦瞓覺啦, 跟手拍一拍梳化, 佢會好乖咁走入帽裏面瞓, 所以一直我都冇洗過頂帽, 只係每日幫佢清走掉落既毛.

今次頂帽濕左, 我乘機洗乾淨, 先驚覺帽邊白色毛毛內包住既係厚紙皮, 一洗就霉, 唔能夠再用啦!

睇返小肥貓響帽入面瞓覺既相:

希望第日主人再買俾佢既床仔, 佢都一樣咁鍾意啦~~