親善大使

以前我對貓既認識好膚淺, 以為貓高竇唔睬人, 唔聽命令, 我行我素. 幾年前開始同貓多D接觸, 先知原來貓都幾友善, 會親近人, 明白人既說話.

到養左小肥貓, 更發覺貓既性格竟然可以好“狗”-----  小肥貓就好似狗狗一樣咁痴人, 鍾意跟出跟入, 好動又八卦, 甚至會幫忙招待客人添~  

佢係屋企既親善大使黎架!

小肥貓唔怕陌生人, 初次見面既客人摸佢撩佢玩佢都唔會抗拒, 會主動挨向客人示好, 或者響地下碌來碌去. 就算主人唔響身邊, 小肥貓都唔會冷落客人, 客人撩佢玩佢會走近, 仲試過好嗲咁挨住客人, tum得客人好歡喜添!



小肥貓挨住客人坐:

有時小肥貓怕客人悶, 會表演節目娛樂下. 佢最拿手既項目就係即興搞搞震, 例如八卦客人帶來既物品, 裝人地紙袋裏面袋左乜野, 更會忍唔住出手搞/咬客人衣物或手袋上既拉鏈扣, 小吊飾等! 好彩小肥貓都算聽話, 只要客人叫住佢或輕輕擋開佢, 佢都會立即停止.



小肥貓八卦袋入面既野:

有客人又發現出動某D“道具”可以令小肥貓做升級表演.

例如有客人用公仔鎖匙扣引小肥貓, 小肥貓係咁追住要玩; 有客人俾條絲帶佢, 佢玩到碌來碌去又爪又咬; 有客人肚餓拎餅仔出黎食, 小肥貓竟然老實不客氣地企上人地大脾, 想人分D俾佢食!  呢D都係客人事後講返俾我知, 好彩佢地講既時候都仲係好好笑咁, 唔似覺得小肥貓麻煩失禮咋!



小肥貓好鍾意玩呢類小玩具, 自己一個都玩得好投入好開心:

下面三張相要多謝客人友情客串:

睇唔睇到小肥貓想做乜?

佢要玩鞋帶呀!!!

出口又出手添:

呢張就係舊相, 示範佢點樣企響人地大脾睇人食野:

相中人係老公, 不過小肥貓對住有食物在手既客人亦一樣係咁勇往直前呢!



客人之中當然亦有怕貓既, 有一位幼稚園小朋友一見到小肥貓就驚, 要我抱起小肥貓先敢入屋, 亦有大人唔敢留響廳度同小肥貓單獨相處. 不過隨著日子過去, 客人都知道小肥貓其實好溫和, 加上我教左佢地一D防小肥貓近身既招數, 好快佢地已經唔再怕, 果位小朋友亦敢快步從小肥貓身邊行過, 仲夠膽響我抱住小肥貓時細細力摸佢添. 

小肥貓已經係屋企重要既一份子, 好多時小朋友入屋第一件事唔係同開門既我打招呼, 而係周圍搵小肥貓響邊, 望到小肥貓先安心. 有小朋友話小肥貓係佢最鍾意既寵物, 要攞小肥貓返屋企養.  更有唔少客人同我講, 話仔女(幼稚園至中學生都有)成日提住要養貓. 有一位後來真係養左兩隻英國短毛貓, 其中一隻仲同小肥貓一樣係啡虎紋毛色添!

更上一層樓

呢幅相係一年前影既:

一年過後, 抓抓板已被摧殘成咁 :

本來早幾個月就應該買新架啦, 不過見小肥貓冇嫌麻繩鬆晒甩皮甩骨, 仍然好落力咁玩, 所以拖到最近先換咋.



新既貓傢俬要自己砌, 一拎出黎小肥貓就好好奇, 仲似乎知道係買俾佢咁, 急不及待要玩:

買時冇睇過實物, 砌完出黎好似都唔錯呢:

小肥貓一見吊住既老鼠仔就衝埋去, 睇佢咬得幾肉緊:

當時佢雙腳凌空, 只靠雙手抓住頂部, 不過睇相唔係好明顯~



吊住老鼠仔條繩好幼, 俾小肥貓一扯就甩:

另一面仲有個波波:

當然亦難逃被扯甩既命運:

小肥貓好鍾意呢件新傢俬, 成日對佢又攬又錫:

同佢玩釣貓遊戲, 佢都鍾意當件傢俬係大本營, 玩一輪返去抖下再出擊:

閒時又鍾意"捐"入去攤抖下:

呢張似唔似笑緊?

原本好想買座高大D好玩D既貓樹俾小肥貓, 奈何地方有限, 唯有買住個細D窄D既. 比起舊果個都叫有進步, 起碼高左一層丫!  希望主人快D有能力換間大屋, 到時就有多D空間俾小肥貓玩, 仲可以買座豪華貓樹俾佢嘆, 人貓齊齊更上一層樓呢!!

八卦仔

小肥貓有個花名叫"八卦仔", 皆因佢貪玩又好奇心重, 乜都鍾意八一餐!

農曆年前有位電訊公司職員上黎整野, 小肥貓呢方面性格就表露無遺啦~

睇下佢搞乜東東?!



完全唔怕陌生人, 竟敢當住師傅面搶野:

真係響正面前搶, 一於當師傅無到:

成功搶走條電線(不過即刻俾主人沒收左):

八緊咩咁投入呢?

原來師傅將電線放左入牆:

捐入去睇真D先:

一人一貓動作又幾一致喎:

睇實師傅做野:

師傅開始響外面拉線, 小肥貓即刻好緊張咁望:

條線"FING"得好犀利, 小肥貓話都係避開少少穩陣D:

拉到咁上下見冇乜動靜, 坐返近D都唔怕啦:

忍唔住再捐入去睇真D:

電視櫃果邊八左咁耐, 梳化旁邊又點可以漏呢:

小肥貓對卷電線貓視眈眈:

其實佢想玩好耐, 俾我阻止左好多次架啦!



呢D係師傅話唔要既, 我就由得佢玩下啦:

三心兩意, 玩玩下白色電線又走去搞黃色呢卷:

睇佢捐到幾入:

平時玩晒D玩具入梳化底又唔見佢咁積極執喎!



小肥貓除左玩電線, 仲玩師傅既背囊帶, 螺絲批, 螺絲釘等, 連牆身跌出黎既石屎粒都唔放過, 搞到我幾乎仲忙過師傅, 要一邊制止隻百厭貓一邊收起佢想玩既野, 仲要一邊同師傅講唔好意思, 再一邊抽空拍VIDEO! 好彩呢位師傅脾氣好好, 見小肥貓係咁搞搞震都仲一路保持住笑容! 



果日有一幕好搞笑架, 不過影唔到, 等我形容下先:

當時師傅蹲響呢個位, 面向電掣做緊野:

小肥貓人立咁雙手搭住梳化靠背, 岩岩夠高由我影相呢個位置裝落去, 師傅一擰轉面見到個貓頭咁樣伸出黎都忍唔住笑, 話未見過D貓八卦成咁喎!

早排響屋苑見返呢位師傅, 我仲諗緊"呢位先生咁面善既響邊度見過呢?"既時候, 佢已經好友善咁主動同我打招呼~ 睇黎屋企隻八卦仔真係令人印象深刻呢!