近況

個幾月冇出BLOG啦, 呢段期間好多野想寫, 無奈工作較忙, 梨形蟲更累我日日做到冇停手, 臨近新年仲病埋添, 大感冒連發燒, 鼻水, 喉嚨痛, 失聲, 咳樣樣黎齊, 宜家D咳都仲未清, 講野仲係上氣唔接下氣!

上個BLOG出完無耐, 小肥貓便便又見血, 驗左依然係梨形蟲.   有朋友見小肥貓醫極都唔好, 建議困佢入籠, 可以減少清潔範圍. 但呢隻貓貓平時已經咁多聲氣, 困住佢實嘈到拆天, 實被鄰居投訴都似! 有朋友又建議幫佢戴大喇叭, 等佢舐唔到自己, 但又有朋友話戴左都一樣舐到手手腳腳喎!

我唔想困住小肥貓亦唔想俾喇叭佢戴, 唔想佢咁辛苦. 有蟲唔係佢既錯, 係都係我照顧得唔好o者, 既然佢無咩大問題, 食得玩得又瞓得, 我情願自己做多D! 不過當小肥貓仲食緊杜蟲藥, 我亦自問盡晒一切能力去"滅蟲"既時候, 再見到佢便便有血, 果種晴天霹靂, 無奈又沮喪既感覺真係好難形容......

上星期我帶左小肥貓睇另一位醫生攞SECOND OPINION, 網上好多人讚呢位醫生專業又細心, 亦醫好過唔少梨形蟲CASE. 佢一睇小肥貓既便便, 就話唔可能有梨形蟲, 因為有梨形蟲便便一定係爛, 唔成形, 冇可能一粒粒咁靚! 用顯微鏡睇亦唔覺有梨形蟲或疑似物體! 為穩陣起見, 醫生仲將便便SEND出去化驗所做多兩種唔同化驗添. 醫生講解左一D除寄生蟲外可能引致出血既原因, 其中較普遍係腸胃有損傷, 佢叫我幫小肥貓停晒杜蟲藥, 改食10日胃藥, 睇下情況有冇改善.

前幾日化驗報告出左, 小肥貓無蟲呀!  真係謝天謝地呢, 一來我唔使咁辛苦, 二來終於可以為小肥貓洗脫污名! 話俾人知佢生蟲幾難聽呢!   而佢食左幾日胃藥, 出血情況真係好似減輕左, 醫生再開多左10日份量, 話便便唔再有血就真係腸胃破損並且醫返好, 否則就要馬上複診, 做詳細驗查.

希望小肥貓食完藥好返晒啦!  



最近冇幫小肥貓影相, 下面兩張都係上個月頭架啦~

我最鍾意影佢瞓到反轉晒個樣, 突左少少牙仔出黎:

呢張坐得正經D, 不過影得佢唔靚仔啊: