開估啦

上次既競猜遊戲, 真係好多謝各位BLOG友參與.  四個答案都有BLOG友估, 最多人估“聽教聽話”(6位), 跟住係“飛擒大咬”(5位), 而“嗲功得逞”及“毫無反應”分別都有3位及2位BLOG友估. 

好開心都幾多BLOG友覺得小肥貓聽教聽話~ 其實佢真係好乖好聽話架, 不過講到食啦喎……佢其實非常進取, 一D都唔客氣, 平時幾乖幾有禮貌都好, 響美食面前就咩都唔記得晒架啦! 所以正確答案就係“飛擒大咬”. 

影呢幅相果次係我第一次帶麥當勞餐返屋企食, 事前完全估唔到小肥貓會有咁大反應, 佢伸個頭埋黎要咬個飽, 咬唔到就大力撞我隻手, 仲出手想抓D薯條添, 我仲記得果餐我食得非常辛苦, 右手拎住個飽, 一邊食一邊用手臂頂住隻為食貓, 左手就負責掩護碟薯條同趕貓! 拿拿臨塞晒個飽落肚, 先空到隻手出黎影佢相, 當時佢已經無癮到死死地氣坐埋一邊了.

下面幾張相就係我之後再食麥當勞餐時影架:


小肥貓八卦聞汽水:

見到薯條忍唔住出手要食:

俾我推開左幾次識趣地行遠少少, 但目光仍離唔開D食物:

好快又行返埋黎, 冇得食坐近D聞下都好:

 

(我今次醒目左冇將薯條倒出黎啦!)

坐咁耐主人都唔心軟, 睇佢個樣幾無癮:

呢D相似乎未係好反映到小肥貓飛擒大咬既個性, 黎緊會有D再激D既, 敬請密切留意!!