小肥貓過新年

 

蛇年已經過左半個月有多, 宜家至同大家拜年似乎太遲!  

不過我諗禮多人不怪, 就等小肥貓同主人響度恭祝大家新年進步, 萬事如意, 人貓身體健康, 心想事成, 蛇年行大運啦~~

著左衫仔既小肥貓係咪特別醒神呢?


件衫係幾年前買架啦, 著左一次就無再著, 今次著返已經扣唔埋鈕了~

小肥貓依舊唔like著衫, 但比第一次有進步既係著住唔再硬晒呔, 能夠周圍行周圍跳仲扭來扭去想除甩件衫添!

只不過佢唔硬呔唔企定定, 我就影唔到靚相啦!

呢張還算似樣:

低頭咬緊件衫:



呢個角度睇, 件衫真係超細呀!

新正頭唔少得貼揮春應下節, 八卦既小肥貓又想搞搞震了:



準備定麻雀枱俾親戚, 第一個享用既竟然係小肥貓:


雖然小肥貓對麻雀枱好有興趣, 但對打麻雀發出既聲響卻不能忍受, 明明前一刻仲做緊親善工作, 親戚開枱佢就馬上閃貓!  有兩次麻雀聲靜返少少時小肥貓行返出廳, 點知半路有洗牌聲又雞咁腳匿返入去! 

匿去邊? 答案就係浴缸喇!

咪睇張相佢好似好淒涼咁, 其實個個都輪住入去探佢摸佢同佢傾計架, 仲拎玩具入去同佢玩添. 

果晚浴缸變成小型足球場, 小肥貓響入面玩得不知幾開心, 只可惜地方淺窄影唔到相. 

主人仲發現響浴缸玩波波比響廳玩好, 唔使三兩下就踢左個波入梳化底無得玩!

主人忙左一整日, 小肥貓又玩左好耐, 客人離開之後人貓都要休息下啦~


年初三又係小肥貓開心既一天(兼主人忙碌既一天)~

早上約左師傅維修固網電話線, 小肥貓又有得八卦啦.

下午主人哥哥一家黎拜年, 小肥貓唔使匿埋, 仲玩得好開心添.

以下相片係姪仔send俾我的, 因當日掛住招呼佢地都唔得閒影相呢!









影相時小肥貓已經玩到好攰, 所以俾支釣貓棒騷擾住都無咁好氣!


小肥貓: 「我靚仔嗎?」