病後感

 

 

上一篇BLOG講到小肥貓病左, 其實仲有下文的!

之前咪話小肥貓間中嘔白泡/黃泡既, 原來又係食錯左野! 到佢嘔返條皺成一舊既膠飲管出黎我先發現.  
而從嘔吐持續時日推斷, 飲管響小肥貓體內應該有差不多一個月! 真係恐怖呀! 好彩嘔得出無事咋!

今次生病同生吞飲管事件, 令我反思對小肥貓照顧係咪唔足夠? 有無粗心大意左? 當日見小肥貓開始打噴嚏, 係咪唔應該咁腦定觀察咁耐, 應該盡早帶佢睇醫生呢? 小肥貓曾經食過膠條落肚, 之後我地亦小心左, 但今次竟然俾佢食左飲管, 係咪我地既危險意識依然不足呢? 應該點樣好好照顧小肥貓呢?

仲有幾日小肥貓就足8歲了, 雖然在主人眼中佢仍然好似個bb咁, 但對貓黎講卻已不再年輕, 或者佢既飲食、生活習慣將會慢慢改變, 我地對佢既照顧方法亦需要調節. 我地好愛錫小肥貓, 卻唔想做過份緊張既家長, 免得為雙方帶來壓力. 不過點為之緊/唔緊張? 唔緊張會唔會變成疏忽照顧? 幾時應緊張幾時唔使又點判斷? 就好似今次咁, 開頭以為貓同人一樣打兩個噴嚏係小事, 結果擔誤醫治令小肥貓受多左苦!  之後小肥貓食住藥一路好緊, 有一朝卻突然多返噴嚏又流返眼水, 我怕佢病情轉壞唔敢拖延即刻帶佢覆診, 原來其實佢康復緊, 呼吸道雜聲少左, 眼仔紅腫亦差不多退晒, 我又似乎緊張左!

平時小肥貓身體幾好無乜病痛(touch wood), 養佢除左好甜好開心窩心之外無乜難度, 今次雖然係小病, 卻令我真正感到擔憂同責任感.  心痛佢唔舒服心痛佢受苦, 又怕為佢做錯決定. 真係自己病都無咁囉囉攣呢!

近排我仲有件事猶豫不決緊, 就係究竟帶唔帶小肥貓驗血驗尿!  上次檢驗距離宜家已經一年, 醫生話應該再驗一次, 最好照埋X光同超聲波全面d check下添!

我既諗法係小肥貓暫時無乜唔妥跡象, 係咪touch wood有跡象先驗先醫都唔遲? 小肥貓每星期接受一次BICOM治療, 上年同今次腎有唔妥跡象都係BICOM機治好, 假設驗到小肥貓腎有毛病, 要轉糧或者食藥、打皮下水咁, 而響呢一刻我相信BICOM機功能多於想跟從傳統西醫治療方法(當然如果情況嚴重或屬急性例外), 如果唔跟醫生指示做, 去驗又係咪多此一舉? 而且照X光, 超聲波有機會要全身麻醉, 會有風險, 我唔想小肥貓冒險呢! 

BLOG友們可以俾我一d意見嗎? 謝謝~~

最近響圖書館借左本書:

我諗都係時候睇定學定, 為日後妥善照顧小肥貓做準備啦~

又俾d相大家睇下丫~

呢張係治療中:

其實治療時影既相次次都差不多, 只係主人每次見小肥貓瞓得舒服relax就忍唔住影!


呢兩張係八卦相:

印象中好似無影到過佢響呢個位搞搞震呢!


早排俾老公捉實要餵藥, 一臉無奈啊:

其實小肥貓都幾痴老公架:

呢張相片既由來, 係我經常將小肥貓挨住我坐既相send俾老公睇, 又話小肥貓挨住我令我唔捨得郁, 有次佢挨左45分鐘先行開, 老公就話我係「變態C貓奴」! 
(註: 我係勁鐘意呢個名, 以得到呢個稱號為榮架)

過左幾日老公放假我返工, 突然收到一批小肥貓挨住佢坐既相, 好似示威返轉頭咁!  後尾我問老公坐左幾耐, 原來都有40分鐘呢!

要數親密照我同小肥貓又點會少?

偷情時間到, 我一伸出手臂, 小肥貓就自動瞓上黎啦:






最後呢張我見親都好想摸佢同錫佢咀仔:

係咪好可愛呢?