一時一樣

小肥貓響我屋企, 鍾意久不久換下攤抖既地方.

舊年八月佢初黎, 可能係夏天既關係, 佢鍾意瞓地板:

入冬開始就改瞓梳化, 最鍾意瞓呢個位, 夜晚熄燈仲識自動埋位添:

最近小肥貓發現左另一處好地方, 就係餐椅啦! 平時我地習慣將餐椅推入檯下面, 早排我響餐檯做野佢跳上黎八卦, 我唔想佢搞搞震就拉張餐椅俾佢坐, 等佢八得黎唔使阻住, 而佢就真係好乖, 好定咁坐響餐椅陪左我好耐~

唔知係咪坐過番尋味, 果次之後小肥貓一見餐椅拉開就第一時間上去霸位, 搞到我地要就住就住咁坐:

而佢竟然仲轉到身喎, 不過就有隻腳唔知點放好:

睇佢個樣幾得戚:

早兩日小肥貓又叻D啦, 餐椅冇拉開都識捐上去:

佢可以瞓成個晏晝都唔落地架, 我行近佢先醒下:

打個呵欠:

仲罕有咁望住鏡頭露出笑容添:

點知唔夠五秒又繼續搵周公去也:

其實果個位好迫架, 轉個身都難, 都唔知點解佢咁鍾意! 有時佢郁來郁去碰到張檯, 仲搞到毛髮蓬鬆, 傻更更咁添~~

餵藥經歷

早排成日要餵小肥貓食藥, 過程有順利有唔順利, 亦有d搞笑野~

試過以前一個人餵藥俾佢抓傷, 又試過用"糖衣陷阱"呃佢俾佢拆穿, 呢次我同老公跟足指引, 用大毛巾包實佢只係露出個頭仔, 老公負責捉實, 我就負責餵.

初期小肥貓只需要食胃藥, 塞粒藥入佢口再掃佢喉嚨, 掃完以為佢吞左, 點知一停手佢就吐返出黎. 後來老公諗到個方法, 就係塞完藥立即塞多粒貓糧俾佢, 等佢為食食埋粒藥! 呢個方法好得, 小肥貓受唔住貓糧誘惑, 但又唔想食粒藥, 於是靠估求其吐返粒出黎, 搞笑既係隻傻貓次次都估錯, 變成吐出貓糧卻食左粒藥! 笑到我地死!! 咁樣餵左幾次之後, 我地直情唔使捉佢, 只需用兩粒貓糧夾住粒藥遞俾佢, 佢就會慌死蝕底咁拿拿聲食~

我地以為從此餵藥實冇難度啦, 原來開心得早左! 醫生加開14日抗生素俾小肥貓, 呢隻藥應該好苦好難食, 第一次佢當胃藥咁食, 食完即刻好辛苦不停伸脷想嘔, 第二次仲掂都唔肯掂, 連食開既胃藥都抗拒埋, 我地唯有再用返暴力.

小肥貓對食呢隻藥反抗好大, 嘔晒白泡都唔肯吞, 閒閒地要餵四五次先成功. 後來我地用"餵藥器"幫手, 將藥丸推到佢喉嚨最入, 再用針筒唧水入口迫佢吞, 效果就好左好多, 佢呑粒藥都冇咁辛苦.

呢段期間餵藥最幫得手, 付出最多既係老公!  為左小肥貓可以按時食藥, 老公連續十幾日專登早起, 夜晚又要減少外出, 餵藥時一邊捉住小肥貓一邊安慰佢, 更將小肥貓抱到貼近自己胸膛, 等佢仰起頭仔食藥時(正確d講應該係俾我夾硬抬高個頭翹開個口時)有得依靠, 仲成為我趁小肥貓動彈不得時肆無忌憚向佢抽水強吻既幫凶添!



睇下小肥貓個坐姿幾騎呢:

呢個角度睇都幾肥美:

佢知道我影佢, 即刻踩住我行左去第二邊呢:

雞柳餐

前幾日開始俾小肥貓轉食雞柳餐, 原本諗住再試一排敏感糧, 但佢肚瀉情況一直冇改善, 禁食後仍然瀉, 有時甚至一日兩次, 我見佢頭尾瀉左個幾星期, 加上有幾位blog友都推介雞柳餐, 就即管試下.

小肥貓對食雞柳一d都冇抗拒(基本上任何乾糧或罐頭佢都食得津津有味), 第一晚開始食, 隔日便便已經正常返晒, 回復以前靚靚既形狀同軟硬度啦!

我會繼續俾佢食一排雞柳, 希望唔會再肚瀉啦!



小肥貓既近照:

佢唔鍾意影相, 唔鍾意望鏡頭:

淨係鍾意八八卦卦:

想打開個罐偷糧呢:

心痛

由去年9月尾到宜家, 小肥貓因為便便有血一直斷斷續續要食藥. 頭三個月食杜蟲藥情況一直冇改善, 今年初轉醫生先check到係結腸炎. 醫生話引致結腸炎最普遍原因係食物敏感, 建議小肥貓轉糧.

1月尾小肥貓開始轉食敏感糧(Royal Canin Sensitivity Control), 醫生仲開左14日抗生素俾佢. 呢次治療效果好明顯, 四日之後便便及抹patpat都已經冇血, 上星期覆診亦一切正常. 我同老公都好開心, 折騰左咁多個月, 小肥貓終於好返啦!

只可惜開心左冇耐, 前幾日情況又有變化, 小肥貓便便次數仍然係每日一次, 但就有肚瀉跡象, 連續幾日都係咁, 有次仲有少少血添. 我上網搵資料, 原來呢種症狀幾普遍, 食敏感糧都唔係百份百得, 唔少貓貓要轉好多款敏感糧先試到一隻岩, 真係幾煩惱!!

今朝打去診所報告小肥貓既情況, 醫生話要餓佢24小時, 俾佢d腸胃休息, 之後再餵返敏感糧睇下有冇好轉, 唔得就要再覆診或者轉糧.

小肥貓宜家正在禁食中, 仲有8個鐘先可以再食野. 本來我以為佢實嘈到拆天, 點知又唔係喎, 或者真係唔舒服冇乜胃口卦, 頭先佢嘔左兩灘白泡, 唔知係咪餓得濟. 見到佢咁樣我真係好心痛呀!!  小肥貓實在太可憐啦, 食咁耐藥都未好, 轉糧之後已經戒清晒零食, 我仲乘機同佢減肥添, 如果早知要禁食, 我就唔同佢減肥啦, 好後悔呀!!

下星期我有事要離開香港幾日, 希望佢快d好返啦, 唔係實擔心死我!



呢幅相係響診所影架, 小肥貓周圍望但唔敢行出黎:

呢幅係早兩個月影, 個身仲係圓碌碌:

呢幅係今日影, 瘦到d骨突晒出黎, 要改名"小瘦貓" 啦:

短暫分離(下)

去接小肥貓之前, 我幻想過好多次同佢見面既情景: 佢會唔會跑到門口歡迎我? 知唔知我去接佢? 見到我會唔會好開心, 用頭仔熱情地不停擦向我? 可惜原來我根本自作多情, 小肥貓不但冇迎接我, 見到我仲避開, 連我行近D佢都走!

出絕招(零食)先可以引佢埋黎:

佢望住我手上既零食, 脷仔都伸埋出黎:

食完終於肯乖乖地俾我摸啦:

好似幾ENJOY呢:

聽以前主人講返佢果幾日既情況, 原來佢第一日下午已經冇再匿埋, 識得去廁所, 同朋友仔相處亦OK, 而且表現成熟左, 有禮貌左, 開餐時佢食完會企開, 等朋友仔食飽有剩先埋去執手尾, 唔似以前自己食完就撞開人地搶住食! 不過佢仍然係咁多隻貓貓之中最頑皮既一個, 夜晚個個瞓佢唔瞓, 周圍行黎行去, 撥床頭D野落地玩, 日頭就做摧花賊, 將盆栽上面既鮮花咬落黎玩.

罪證--->成地花瓣:

小肥貓響果度好食好住, 又有朋友仔陪, 追追跑跑咁不知幾開心, 所以佢都冇掛住我, 我帶佢走佢亦唔係好情願, 響貓袋裏面叫得好悽厲. 我從未聽過佢咁長咁悽厲既叫聲, 諗起佢要跟我返一個又細, 又冇朋友, 又冇野玩既地方, 心裏面都有D唔舒服呢!

返到屋企, 佢周圍巡左一陣就跳上窗台休息:

跟住跳落梳化沖涼:

我摸佢佢冇再縮, 識得嗲返我啦! 算佢啦, 如果唔係呢篇BLOG既標題就會係"無良心的肥貓"!



溫馨小插曲:

小肥貓唔響身邊, 我問老公有冇掛住佢, 老公話冇, 仲話冇佢響度都不知幾爽, 唔使關房門, 唔使一日吸幾次塵, 朝早唔會俾佢嘈醒, 又唔怕佢搞搞震...... 點知到見返小肥貓, 老公係咁摸佢又同佢講野, 仲好似錫左佢一啖添!

我唔敢相信我對眼, 向老公求證, 老公話「梗係唔係錫啦! 我搵鬚根拮佢個頭咋嘛!!」