久違了的紙箱

小肥貓同其他貓貓一樣鍾意玩紙箱, 可惜由於體型關係岩佢坐既箱比較難搵! 早排屋企買左個電蒸爐, 紙箱size就岩岩好啦!

小肥貓一邊坐一邊聞, 聞完箱底就露出呢個表情, 唔知係咪聞到怪味呢:

目送老公入房:

影佢時佢剛想打呵欠, 俾我捕捉到個咁既怪樣:

有無留意個紙箱已經俾小肥貓咬到一岩一忽?

屋企有客人, 爛箱就放埋一邊, 但無阻小肥貓入去坐既興致:

隔離既吸塵機箱都係小肥貓既玩具, 成日玩到移晒位:

掉左電蒸籠箱, 搵到個鞋盒俾小肥貓:

個蓋都好好玩架:

箱入面既小肥貓係咪好可愛呢:



有興趣睇返小肥貓之前玩紙箱既得意野, 可以去呢度:

http://littlefatfatcat.blogspot.hk/2009/10/blog-post_5.html

梳化超等座

小肥貓好多時鍾意響梳化攤唞或者挨住主人坐, 不過當我同老公同時坐梳化, 小肥貓可能嫌迫卻甚少加入. 試過好多次小肥貓響梳化我同老公坐埋過去, 佢更加會毫不留情即走添!

而自從小肥貓愛上坐梳化背呢個超等座之後, 就不但唔會避開我地, 仲會主動加入添~


先post幾張小肥貓坐超等座既相~

望住鏡頭一本正經:

側面一樣咁靚仔:

縮埋晒手手腳腳, 好似條大毛蟲咁:

呢個角度睇到小肥貓個傻瓜樣:

跌左隻手出黎:

坐得多超等, 小肥貓有時都轉下坐普通等, 同我地迫埋一齊:



呢張睇到其實佢瞓左響老公大腿下面:


本來佢係打貓餅架, 瞓瞓下就霸埋老公果邊啦!

呢張會唔會有d糾纏不清既感覺呢?

小肥貓坐超等座, 同佢影合照亦方便左:

可惜佢唔鍾意影相, 影親表情都麻麻, 所以到今時今日我都未同佢影到一張滿意既合照呢!



溫馨小插曲:

老公從來唔肯表態係咪鍾意小肥貓, 問親佢一係答到無黎正經一係就答左等如無答! 但係透過一d細微既事, 卻唔難令我估到答案~

就好似當小肥貓縮起晒手手腳腳坐到好似條大毛蟲既時候, 老公響梳化玩緊iPad, 我影小肥貓時老公亦停玩遊戲拍左幾張, 拍完仲即刻揀左張做wallpaper添!


呢個貓樣就係老公拍架啦, 宜家係佢iPad同我公司電腦既wallpaper:

老公既WhatsApp wallpaper用既都係小肥貓相黎架!

呢張相係我好鍾意既, 雖然拍得唔清又影唔到小肥貓個靚仔樣, 但影到佢地掂住對手, 好溫馨呢 :

花名

 

同小肥貓一齊生活左三年幾, 唔經唔覺原來幫佢改左好多花名, 等我逐個介紹下啦!


「小傻貓」/ 「傻瓜」: 呢個係小肥貓既第一個花名, 除左因為覺得佢表情神態有幾分傻氣之外, 佢間中發傻喪跑暴衝怪叫都係我咁叫佢既原因. 而響我心目中, 可愛既小動物都係有點傻氣架~ 

無無聊聊果時既傻樣:




恰緊眼瞓既傻樣:


  

就連眼仔碌碌時都帶少少傻氣:

「小笨貓」: 佢俾我整蠱, 又或者論論盡盡失手/失足既時候, 我就會用呢個名笑下佢~

最容易令小肥貓失手/失足就係跳餐枱, 通常佢可以好輕易跳上去, 但當佢肥左就會跳得論盡, 甚至上唔到跌返落黎. 所以一見咁既情況我就知要幫佢減肥了.


佢仲試過由地面直接跳上鞋櫃頂添, 果度比餐枱仲高D, 咁叻仔就梗係要即刻讚佢請佢食零食啦~

「八卦仔」: 有睇開呢個blog既朋友都知, 小肥貓係隻超級八卦貓, 人地做乜都關佢事, 打開櫃門拉開櫃筒佢都要霸個靚位望下, 放衫入洗衣機佢又要裝, 有嘢食就更加第一時間衝埋你身邊八下你食D乜, 慌C蝕底咁, 所以一有以上既情況, 我就會叫佢「八卦仔」啦!

八卦照:

響安全情況下, 一般我都會滿足小肥貓既好奇心, 佢想睇想聞都由得佢, 唔想令佢覺得被拒絕, 而我對佢既了解亦會多D, 知道佢鍾意乜抗拒乜, 無意中仲發現左個趕貓必殺絕招添----> 小肥貓最怕香味濃既lotion, 聞過兩次之後見我打開個蓋已經走夾唔唞了~

我每次擦cream, 其實擦黎擦去都係果幾支, 佢都要聞架:

「C懶鬼」: 貓貓一日可以瞓十幾廿個鍾, 有時見佢瞓極都唔出黎當左床仔係佢個殼咁, 就幫佢改左呢個花名啦.

我唔記得呢個花名係我定老公改先, 不過一直以來叫得最多係老公, 通常我叫老公幫手做家務既時候, 老公就會向住小肥貓加多句: 「喂~ C懶鬼! 起身洗碗/吸塵/倒垃圾......啦! 仲掛住瞓!」而聰明既小肥貓, 當然知道幾時要起身, 幾時最好繼續瞓啦~

「咸濕仔」: 呢個係老公改架, 因為小肥貓成日跟我入洗手間, 唔俾佢入就又叫又拍門. 有時佢見我由睡房拎衫出黎, 知道我要沖涼更加會快步入定去等我添.




「C o靚仔」: 係小肥貓搗蛋/闖左禍我鬧佢時候用既. 小肥貓知自己有冇做錯事架, 無拉拉捉佢佢會大力反抗仲要咬我, 但做錯事俾我捉住鬧就一D都唔反抗, 仲會放軟身體好弱小好可憐咁, 搞到我唔忍心鬧落去呢. 


「古惑仔」: 一般情況下小肥貓係被禁止入睡房的, 不過越禁佢就越想入, 有時佢明明響床仔瞓得好地地, 聽到聲知道我地開左睡房門, 就會趁機偷偷潛入去. 有時我地入去拎少少野, 轉頭佢已經響床上面了. 小肥貓唔只識偷偷潛入, 仲會強行闖關, 明明只開好少門甚至用對腳頂住佢, 佢都可以唔知點樣就擠左入去, 仲要一個箭步跳上床好似宣示主權咁, 叫極都唔走.

壓軸既兩個花名, 根據非正式統計應該係使用率最高既, 就係「靚仔」同「衰野」啦~

「靚仔」: 係我對小肥貓發自內心既專稱黎架, 原因其實唔使解釋, 不過我都想講一次(甚至一百次一千次), 就係響我呢個唔理性既超級貓奴眼中, 小肥貓點睇都係咁靚仔, 幾時都係咁靚仔, 做乜都係咁靚仔, 點傻都係咁靚仔...... 所以呢個名自然最貼切不過~ 

不過, 老公對此就唔係好認同啦! 加上「靚仔」既稱號佢都未得到卻竟然落左響隻貓度, 聽住我成日靚仔前靚仔後咁叫小肥貓就更加覺得不是味兒, 於是我叫一聲「靚仔」老公就響旁邊搭一句「衰嘢」, 呢兩個名花咪雙雙榮登榜首囉~~ 哈哈~~

唔知blog友們有冇幫自己既寶貝改過D得意, 特別既花名呢?