食不下嚥

小肥貓最鍾意食, 食量大又食得快, 不過呢兩日佢對住碟糧冇晒心機, 仲唔肯食添! 點解? 因為裏面落左藥!

前幾日帶小肥貓去睇醫生, 驗到佢有寄生蟲, 醫生開左藥丸同藥水俾佢. 我學醫生將藥丸放入佢口, 俾佢掙扎時抓損, 於是將藥丸整碎, 連藥水混落d糧到俾佢!

尋晚泡製左第一餐加料餐, 平時五分鐘唔使就食得晒既份量, 小肥貓由頭至尾食左三個鐘! 今朝第二餐更加食到黃昏都仲有剩! 佢根本唔肯食, 聞下碟糧就走開, 我逐粒餵佢佢肯慢慢食少少, 唔餵就一d都唔食! 到黃昏我見仲有咁多(剩三份二), 餵佢又唔肯食, 我同佢講"你再唔食我食晒佢架啦", 然後將碟糧放響咀前扮食, 佢即刻好緊張咁行埋黎, 我放低碟糧俾佢, 佢竟然乖乖咁自己食呀! 好搞笑~~ 佢食得好慢, 食幾啖停落黎我又扮同佢爭, 佢又肯再食d! 到後尾佢點都唔再食, 我見唔算剩好多(剩六份一左右), d糧又實在放得太耐, 就冇再氹佢食啦!

其實如果唔係驗到佢便便有寄生蟲, 佢一d都唔似有病, 食得玩得又訓得. 平時佢最大愛好就係食, d藥令佢連最大愛好都放棄, 食既時候仲係食下吐下, 睇到真係幾心痛!

我唔想小肥貓黎緊六日(醫生開左七日藥)都咁慘, 原本諗住今晚等老公返就一齊同佢"拼命", 夾硬餵藥落佢咀入面, 亦已做好損手爛腳既準備!  點知老公提醒我: 小肥貓鍾意飲奶, 不如試下將d藥放入奶, 分幾次俾佢飲等冇咁大陣藥味啦!

呢招果然使得! 兩次加料奶佢好快飲晒, 餵多次加料罐罐都食埋, 照咁做多兩次應該可以餵埋今日藥既份量啦!

見到佢肯食我都開心d, 因為佢今日個樣真係乜晒心機, 成日伏響窗台/櫃低郁都唔郁, 平時好鍾意講野今日都唔多出聲, 望住滿滿一碟糧卻食唔落時個樣不知幾可憐呀!

  

愛上窗台

小肥貓一向鍾意訓地下, 最近部新吸塵機迫到佢成日要避上窗台, 佢開始發覺窗台係個好地方: 涼浸浸, 可以望遠d, 又冇咁易被騷擾!

今日佢大部份時間訓響窗台, 8號風號風聲好勁, 初時一有聲佢會好警覺咁起身望, 望左幾次就一於少理, 舒舒服服攤響到休息.

我影左好多張佢都唔睬我!  哼! 你估你唔擰過黎我就影唔到啦咩?

原來隻傻貓響度發緊吽唞呢!

新吸塵機

早幾日趁老公放假, 我地專登出去買左部新吸塵機.

買新機主要都係因為小肥貓! 相信有養貓既朋友都一定知道, 貓貓甩毛非常厲害, 行過會甩幾"執", 抱下又會甩到你成件衫都係毛. 但對我黎講毛都係其次, 砂先係嚴重問題! 小肥貓去完廁所會將d砂帶到周圍都係, 屋企經常有人出入, 唔能夠讓人一入黎就踩到成腳砂, 而且d砂唔立即清理, 被踩到更會刮花木地板. 小肥貓黎左兩個月唔夠, 屋企地板已經傷痕累累, 唔少傷痕好明顯係砂粒造成!

本來我用手提式吸塵機對付貓砂, 用乾電夠方便吸力亦OK, 缺憾係吸咀細, 用時要踎響度將吸咀貼住地板逐寸逐寸吸, 睇漏眼就吸唔乾淨, 而且咁吸法一日五六次真係幾辛苦, 唔係踎到腳軟, 就係跪到膝頭哥瘀! 除左手提式屋企仲有部OSIM水瀘吸塵機, 但部機又大又重, 用時要裝要拆又係極麻煩!

原本我地諗住買部直立式吸塵機架, 之前響親戚屋企見過, 親戚舊年買300蚊左右. 點知果日我地搵唔到, 可能舊款冇再出, 貴d千幾二千蚊一部既就有, 梗係唔考慮啦! 好彩後尾我地睇到呢款, SIZE的式, 最岩係可以駁長再加個吸地板既頭, 裝拆, 清潔都非常簡易, 價錢亦唔算貴, 500蚊有找!

宜家用呢部機吸砂真係方便快捷好多, 不過小肥貓就慘d啦, 一聽到咁勁既吸塵機聲就嚇到走夾唔抖, 我有時整估佢, 佢匿去邊我又專登吸去邊, 迫到佢跳上窗台避!

睇下佢嚇到縮埋一舊! 哈哈!

為食貓過節

今年中秋係小肥貓黎我屋企過既第一個節日!

過中秋梗係要食月餅啦, 有位好朋友知我養左隻貓, 專登送盒加菲貓月餅俾我. 呢款月餅包裝好特別, 味道都唔錯架:

出名為食既小肥貓, 一聞到月餅味就第一時間跳上枱!

睇下佢個為食傻瓜樣:

月餅太肥膩我唔敢俾佢食, 只係引下佢, 點知佢忍唔住出手啦:

出完左手出右手, 仲企到高一高添, 咁睇佢其實一d都唔肥啊:

拮一小塊出黎再引佢:

又係出完左手出右手:

見佢咁想食, 我最後都心軟俾佢舐下枝牙籤, 上面有少少蓮蓉架:

佢出力咁舐, 舐到脷都卷埋, 仲舐左好耐舐到枝牙籤乾淨晒都唔捨得停:

動物傳心術

八月中我參加左一個動物傳心術課程, 報名時(七月初)我未知小肥貓會成為屋企一份子, 報讀純粹因為自己好喜歡小動物, 又經常接觸貓貓狗狗, 想了解多d呢樣咁神奇既能力, 試下同佢地溝通. 後來小肥貓黎左, 午夜狂呼困擾出現, 傳心術就正好大派用場!

課堂上我同幾位同學先後跟小肥貓溝通, 第二日我再請導師同小肥貓傾多d, 終於知道左佢既想法!

小肥貓仍未習慣新環境(當時黎左只係一個星期), 半夜叫因為覺得悶好想玩, 亦好掛住以前一齊生活既貓貓同伴, 懷念以前住既地方. 佢仲話食得唔夠多, 想食多d零食, 話食飽d夜晚會訓得好d添~~

有人會覺得呢d答案咁普通, 稍為對動物認識多d, 對佢地習性了解多d既人都可以講得出啦, 有乜咁出奇喎! 但我就唔係咁諗喇!

我請傳心師問小肥貓鍾意以前住既地方定新地方多d. 傳心師收到小肥貓傳來既影像: 佢響一個好大既地方一條黃色既樓梯度向上跑, 小肥貓鍾意以前地方大d, 不過都鍾意新地方, 覺得我地好錫佢, 唔會蝦佢.

提出呢條問題之前我冇同傳心師講過佢以前住響點樣既地方, 係大係細都冇提, 但傳心師竟然可以講出有條樓梯! 相入面就係果條又闊又高樓梯既一角, 左面隻小黑貓同小肥貓好老友架:

我亦請傳心師問小肥貓鍾意同人訓定一個貓訓. 果排佢半夜狂叫, 上床訓會叫, 趕佢出廳訓又怕佢唔開心. 傳心師話小肥貓覺得冇乜所謂, 訓邊都得, 但如果同人訓佢就鍾意訓床尾.

小肥貓唔係成日同我地訓, 俾佢上床無論訓得耐唔耐, 佢真係只訓床尾, 一次都冇響床頭或中間訓過, 唔似其他貓貓鍾意訓主人個頭旁邊, 或者"捐"響大脾之間. 課程前一晚佢訓床尾, 我同老公怕踢親佢仲縮埋對腳訓添!

呢兩題答案咁準, 估中機會咁微, 好難叫我唔相信傳心術真係得! 去年我曾搵過傳心師幫忙, 當時係經email聯繫, 今次親身參與感受震撼得多. 果日我都有同小肥貓溝通, 我問問題佢有回答, 不過可能因為信心不足, 成日"營"住d答案及影像係我自己想像出黎既, 返屋企試亦有d疑幻似真, 不過堂上同其他寵物溝通, 佢地主人又覺得我講得中喎!

我好希望可以試多d, 慢慢學得好d, 第日能夠同小肥貓傾到計, 多d了解佢呢!

午夜狂呼

小肥貓係一隻好鍾意"說話"既貓貓, 會叫人又會應人, 而且語氣千變萬化, 有時嬌聲嗲氣, 有時粗聲粗氣, 有時怪聲怪氣, 間中仲會沙沙地聲好似岩岩訓醒咁!

佢搬黎除左頭一晚粒聲唔出之外, 第二晚已經開始叫, 果晚佢訓房窗台, 半夜三點幾突然不停大叫, 我同老公以為佢想出廳, 但房門根本冇關, 出到廳都繼續叫! 我地又諗佢會唔會肚餓呢, 即刻開餐俾佢, 點知食完都仲係叫, 搞到我地成晚無覺好訓! 幸好第二日咁岩有「風假」俾我地休息.

小肥貓訓窗台:



之後幾晚小肥貓例牌半夜大叫, 我地怕嘈到鄰居連窗都唔敢開, 訓著又俾佢d叫聲嚇到扎醒, 一晚三幾次! 睡眠不足嚴重影響日間工作狀態, 我地只好狠心夜晚留佢一個響廳, 關上走廊門及房門先冇咁應聲咋.

果排我地對住小肥貓講得最多既, 就係問佢做乜成日半夜叫, 次次老公問完仲會加句: 「再叫我劏左你!!!」