正宗為食貓

玩, 食同瞓係小肥貓貓生三件大事, 其中又以食最重要, 知道有得食, 瞓緊可以彈起身, 去緊廁所都可以彈返出黎!

下面輯相係幾個月前影架啦, 果次係第一次請小肥貓食乳酪, 原來佢勁鍾意呢!

個頭仔"岳"到盡晒望實杯乳酪:

開始有行動:

小肥貓目光一直冇離開過杯乳酪, 好似望少陣美食就會消失咁:

係咁伸個頭埋去要食:

其實佢一早已經企高左, 只係呢張先影得清楚少少:

佢個頭一味向前伸, 隻手搭住我, 全身大部份重量就卸左落我度:

我一邊同小肥貓糾纏一邊拿拿臨食, 食完先俾佢LAM下杯蓋, 睇佢LAM得幾落力:

 

第一次毫無準備, 用手機拍出黎效果唔好, 後來用相機就清楚好多.

小肥貓認得個乳酪杯, 一見到就好緊張咁企高:

我次次都俾佢食先架:

到我食佢又跟埋黎, 仲連個杯外面都唔放過要LAM下:

係咁叫要我俾佢食:

前面攻唔入, 出新招由梳化後面突襲:

繼續變招:

食唔到乳酪竟然咬我隻手:

好無癮地坐響度望住我食(留意佢個鼻彈到少少乳酪呢):

肯乖乖地等, 我食完咪有你份咯:

睇完呢兩輯相, 我相信響為食方面小肥貓認第二, 都冇貓敢認第一啦卦!!

開估啦

上次既競猜遊戲, 真係好多謝各位BLOG友參與.  四個答案都有BLOG友估, 最多人估“聽教聽話”(6位), 跟住係“飛擒大咬”(5位), 而“嗲功得逞”及“毫無反應”分別都有3位及2位BLOG友估. 

好開心都幾多BLOG友覺得小肥貓聽教聽話~ 其實佢真係好乖好聽話架, 不過講到食啦喎……佢其實非常進取, 一D都唔客氣, 平時幾乖幾有禮貌都好, 響美食面前就咩都唔記得晒架啦! 所以正確答案就係“飛擒大咬”. 

影呢幅相果次係我第一次帶麥當勞餐返屋企食, 事前完全估唔到小肥貓會有咁大反應, 佢伸個頭埋黎要咬個飽, 咬唔到就大力撞我隻手, 仲出手想抓D薯條添, 我仲記得果餐我食得非常辛苦, 右手拎住個飽, 一邊食一邊用手臂頂住隻為食貓, 左手就負責掩護碟薯條同趕貓! 拿拿臨塞晒個飽落肚, 先空到隻手出黎影佢相, 當時佢已經無癮到死死地氣坐埋一邊了.

下面幾張相就係我之後再食麥當勞餐時影架:


小肥貓八卦聞汽水:

見到薯條忍唔住出手要食:

俾我推開左幾次識趣地行遠少少, 但目光仍離唔開D食物:

好快又行返埋黎, 冇得食坐近D聞下都好:

 

(我今次醒目左冇將薯條倒出黎啦!)

坐咁耐主人都唔心軟, 睇佢個樣幾無癮:

呢D相似乎未係好反映到小肥貓飛擒大咬既個性, 黎緊會有D再激D既, 敬請密切留意!!

無獎競猜遊戲

肥貓禁地睇左好多篇啦, 今次有野俾大家估下!

話說有一次我買左個麥當勞魚柳包餐返屋企, 呢幅相係開完餐影既:

大家估下我開緊餐時, 小肥貓有咩反應?

1.      毫無反應

小肥貓係一隻好乖好懂性既貓貓, 一心只係陪住主人, 唔理主人食野定做野, 佢都只會靜靜咁坐響旁邊守護住, 但就唔會騷擾主人.

2.      聽教聽話

小肥貓好奇地聞魚柳同薯條, 主人話佢知佢唔食得, 輕輕推開佢. 雖然佢好唔情願, 但都即刻乖乖地坐埋一邊, 唔再騷擾主人.

3.      嗲功得逞

小肥貓聞到香噴噴既魚柳同薯條, 要主人請埋佢, 主人最初唔肯, 但抵受唔住佢又嗲又可憐既叫聲, 俾左少少佢食, 食完佢就好滿足咁坐埋一邊.

4.      飛禽大咬

小肥貓聞到香噴噴既魚柳同薯條, 哄過去搶住食, 主人推開佢都仍然猛中個頭埋去, 最後佢明白鬥唔過主人, 只好死死地氣坐埋一邊.

以上四種情況, 唔知大家估邊種呢?

答案下個BLOG揭曉~~

肥貓禁地(三)

第三個小肥貓禁地係睡房, 呢度初頭並唔係禁地黎架, 係自從小肥貓被誤診有梨型蟲, 我要縮減佢既活動範圍先唔俾佢入. 不過後來知道唔關生蟲事, 睡房都冇即時解封, 因為呢間房已經變成全屋最亂既地方, 原本放響廳既公仔, 擺設, cushions等, 加埋平時懶得執拾既雜物統統搬晒入去...... 除左張床同旁邊少少位之外, 己經冇地方俾人同貓落腳!

唔俾小肥貓入就要成日關住度門, 早排回南天空氣潮濕, 睡房成日有陣UP味, 牆身仲開始有少少發霉添!! 結果, 為左通風起見, 第三個禁地又同前兩個一樣, 變為局部時間解封, 小肥貓有多個地方逛下啦!

小肥貓好鍾意伏響床尾位:

好偶然會響床頭:

我見佢乖乖地定定地, 會由得佢攤抖耐D, 但如果搞搞震, 就無得留底架啦! 不過小肥貓通常好乖, 想曳曳時我大聲D叫下佢, 佢就唔敢亂黎!

有時我好攰入房小睡, 佢會入埋黎陪我, 仲鍾意瞓響我對腳上面添:

雖然我都好享受有佢陪住瞓下覺, 但夜晚瞓覺就一定唔會預佢, 一來佢瞓床尾我同老公怕一下唔覺意踢左佢落床, 二來佢會行出行入, 出去時好靜, 入黎就會好有禮貌咁同你打招呼, 半夜三更會俾佢嚇醒! 反而佢自己響廳瞓就仲安靜, 大家都有安樂覺瞓!



溫馨小插曲:

老公唔太鍾意俾小肥貓入睡房, 怕成床都係貓毛, 又怕佢呢頭去完廁所果頭跳上床好唔衛生, 所以通常老公唔響屋企我先俾小肥貓入房.

有次老公響度, 我入房時小肥貓竄入左去, 過左一陣仲未出黎, 我怕驚動老公, 諗住開零食罐會引到小肥貓出黎, 點知都係俾醒目老公注意到. 老公話: 你仲俾野佢食? 喝佢出黎咪得囉! 然後非常正氣凜然咁行入房! 我想像到小肥貓急急腳飛機耳咁行出黎個樣, 但結果卻出乎意料之外!

小肥貓一見老公行入房, 就發出左一聲又長, 又開心又嗲既叫聲, 我離遠聽到都即刻冧晒~   結果小肥貓不單只冇俾人趕出黎, 仲有人坐埋佢旁邊摸佢, 問佢係咪坐得好舒服添!!