短暫分離(上)

農曆年前同老公有事有幾日唔響香港, 我將小肥貓帶返佢以前主人度, 托前主人幫手照顧, 亦俾佢有機會見下D舊朋友仔, 響個大D舒服D既地方玩下.

小肥貓同朋友仔以前既生活照:

仲有呢位老人家:

當日我一早送小肥貓去, 佢應該仲記得以前住過既地方, 而且好快搵到一個理想既藏身位置:

佢好鍾意響呢個位瞓覺, 冇咁易俾人搵到. 果朝佢匿左好耐, 直到我離開都冇再行出黎.

小肥貓唔響身邊, 我真係好掛住佢, 擔心唔知佢適唔適應, 去廁所乖唔乖, 有冇同朋友仔打交, 或者有冇搗蛋搞亂檔咁! 我又會諗返好多生活片段, 例如每朝俾佢嘈醒提我俾野佢食, 我行去邊佢都跟住尾, 坐梳化佢又痴埋黎, 俾人鬧就雞咁腳走......冇左佢真係唔係好習慣呢! 

近況

個幾月冇出BLOG啦, 呢段期間好多野想寫, 無奈工作較忙, 梨形蟲更累我日日做到冇停手, 臨近新年仲病埋添, 大感冒連發燒, 鼻水, 喉嚨痛, 失聲, 咳樣樣黎齊, 宜家D咳都仲未清, 講野仲係上氣唔接下氣!

上個BLOG出完無耐, 小肥貓便便又見血, 驗左依然係梨形蟲.   有朋友見小肥貓醫極都唔好, 建議困佢入籠, 可以減少清潔範圍. 但呢隻貓貓平時已經咁多聲氣, 困住佢實嘈到拆天, 實被鄰居投訴都似! 有朋友又建議幫佢戴大喇叭, 等佢舐唔到自己, 但又有朋友話戴左都一樣舐到手手腳腳喎!

我唔想困住小肥貓亦唔想俾喇叭佢戴, 唔想佢咁辛苦. 有蟲唔係佢既錯, 係都係我照顧得唔好o者, 既然佢無咩大問題, 食得玩得又瞓得, 我情願自己做多D! 不過當小肥貓仲食緊杜蟲藥, 我亦自問盡晒一切能力去"滅蟲"既時候, 再見到佢便便有血, 果種晴天霹靂, 無奈又沮喪既感覺真係好難形容......

上星期我帶左小肥貓睇另一位醫生攞SECOND OPINION, 網上好多人讚呢位醫生專業又細心, 亦醫好過唔少梨形蟲CASE. 佢一睇小肥貓既便便, 就話唔可能有梨形蟲, 因為有梨形蟲便便一定係爛, 唔成形, 冇可能一粒粒咁靚! 用顯微鏡睇亦唔覺有梨形蟲或疑似物體! 為穩陣起見, 醫生仲將便便SEND出去化驗所做多兩種唔同化驗添. 醫生講解左一D除寄生蟲外可能引致出血既原因, 其中較普遍係腸胃有損傷, 佢叫我幫小肥貓停晒杜蟲藥, 改食10日胃藥, 睇下情況有冇改善.

前幾日化驗報告出左, 小肥貓無蟲呀!  真係謝天謝地呢, 一來我唔使咁辛苦, 二來終於可以為小肥貓洗脫污名! 話俾人知佢生蟲幾難聽呢!   而佢食左幾日胃藥, 出血情況真係好似減輕左, 醫生再開多左10日份量, 話便便唔再有血就真係腸胃破損並且醫返好, 否則就要馬上複診, 做詳細驗查.

希望小肥貓食完藥好返晒啦!  



最近冇幫小肥貓影相, 下面兩張都係上個月頭架啦~

我最鍾意影佢瞓到反轉晒個樣, 突左少少牙仔出黎:

呢張坐得正經D, 不過影得佢唔靚仔啊:

主人的特別嗜好

以下內容可能令人不安, 敬請留意!





經過個多月既治療, 小肥貓應該已經好返晒啦! 點解用"應該"咁唔肯定? 因為梨形蟲實在難杜, 又易返發, 小肥貓停左藥到宜家近三星期, 便便一直正常, 唔似生蟲時經常有血, 所以睇黎應該無事. 不過梨形蟲令我有D陰影, 我唔敢講小肥貓絕對OK, 家居清潔亦未敢鬆懈落黎!

呢段期間為左觀察佢D便便, 我成日要吼住佢去廁所. 小肥貓既辦事習慣幾有規律架, 通常面向出口, 辦小事縮入D, 辦大事就會企高D, 伸出D, 好似咁樣:

呢幅相係8月佢初黎時影架, 我好鍾意睇佢去廁所個樣, 咁認真既表情平時真係難得一見! 最搞笑係我裝佢時佢又唔郁得, 好似被人點左穴咁, 只能轉動眼睛好無奈咁望我一眼, 然後回復直視前方既認真樣繼續未完成既工作!  而要睇佢D便便, 就要同佢鬥快, 趁佢轉身既時間偷窺, 否則佢一撥砂就睇唔到架啦.

講開便便話題都要讚下小肥貓, 佢係好乾淨企理既貓貓, 無論大小事辦完佢都會用砂蓋好, 特別宜家我成日洗佢個廁所, 唔想落得多砂浪費, 更加見佢好有意識地用砂蓋住便便. 有時佢撥好離開左廁所, 過一陣可能諗返唔滿意, 又會再返去撥多兩下. 聽過有D貓貓有潔癖, 每去一次廁所(不論大小)就要主人清理一次, 否則死忍都唔肯再光顧, 好彩小肥貓唔係咁咋!

小肥貓辦完大事就輪到我開工啦! 鏟便便係厭惡性工作, 不過我無乜所謂, 貓砂吸晒異味一D都唔覺臭, 加上我太鍾意小肥貓, 連佢D便便我都覺得係得意既, 鏟上黎仲會留心份量, 形狀, 顏色, 有冇血跡等! 老公成日笑我變態呢~~ 

早排唔知小肥貓係咪俾我裝得多終於唔耐煩, 連續幾日吼我未起身, 或者唔響屋企時辦大事, 搞到我咩都睇唔到. 後來當佢肯俾我睇, 我亦識趣臨尾先行近, 唔似以前咁肆無忌憚觀足全程!  希望佢第日唔會再避, 等我可以繼續觀便, 繼續日日做"驗屎官"啦!

三個月了

不經不覺與小肥貓同居已經三個幾月啦, 有時望住佢, 我仍然會諗: 係咪發緊夢呢!

諗返最初佢黎果段日子, 人同貓都好唔適應, 特別係小肥貓, 成個生活環境甚至照顧佢既人都唔同晒, 以前佢有大屋住, 有其他貓貓同佢玩, 新地方唔單止冇晒d朋友, 就連可以跳得高d, 跑得快d遠d既空間都冇! 而我同老公就要脫離輕鬆既二人世界生活, 照顧多個小朋友!

最初諗養貓以為好輕鬆, 貓貓自理能力高, 唔依賴主人, 又唔需要帶出街, 應該冇乜麻煩! 點知原來湊一隻貓都唔係一件易事! 或者我太緊張啦, 好多時都擔心唔知佢夠唔夠飽, 悶唔悶, 開唔開心, 天氣熱擔心佢一個貓響屋企冇冷氣會熱壞, 出街晏返餵唔切又驚佢餓壞, 唔得閒陪佢玩又怕佢悶親! 再加上要做好多家居清潔工作, 更加搞到個人好攰兼且周身唔得閒!!

經過三個多月既相處, 人同貓都逐漸適應. 小肥貓除左肚餓同要人陪, 好少好似初黎時大聲叫不停, 半夜亦好乖好靜自己瞓覺(不過七點幾肚餓就會叫), 佢仲好聽話好痴人, 同老公相處得好好添~

宜家唯一既煩惱, 就係小肥貓d寄生蟲仲未好, 問過醫生又上網睇過, 都話梨形蟲好難斷尾, 因為貓貓會lam自己, 如果便便後身上沾有蟲卵, 又或者蟲卵被帶離砂盆污染到周圍環境, 再沾到貓貓身上, 又會好容易俾佢lam返落肚! 為左小肥貓既健康, 我日日用消毒藥水抹兩三次地, 枱同櫃以至佢經常掂到既地方都盡量消毒, 上星期開始更日日清洗砂盆! 布梳化難清潔, 唯有勤d洗梳化套, 睇下好唔好d.

希望小肥貓可以快d好返就好啦~~

佢好鍾意挨住人坐架:

睇下瞓得幾舒服:

俾佢咁挨住真係覺得好開心好溫馨, 唔捨得行開呢!

靈異照片

早排拍到輯"靈異照片", 趁Halloween放上黎應下節:

似唔似呢隻? ---->

老公同我都唔鍾意影相, 屋企只得一部普通數碼相機看下門口, 我地冇耐性慢慢研究function, 研究點先拍得靚, 小肥貓又唔會坐定定俾我地影, 於是我地就經常影到d矇查查既作品啦!

後尾我發覺先拍video, 再由video cut相效果好d, 今次輯相都係用呢個方法, 不過可能小肥貓動作太快, 部相機又唔夠PRO, 所以點cut都依然有靈異效果!

當時小肥貓玩緊毛毛老鼠, 佢一有得玩就好瘋狂架啦, 仲好有策略咁款, 有時離遠(或近距離)監視獵物:

有時凌空撲撃: 

咬住左隻老鼠, 都仲要又撲又抓, 擔來擔去:

宜家我盡量每日抽半個鐘同佢玩, 有時玩毛毛捧, 有時玩老鼠或者波波, 希望佢保持身手敏捷同活力, 千祈唔好越來越肥呢!!

鬥智鬥力

上星期小肥貓又睇左次醫生, 佢d寄生蟲(梨形蟲)未清晒呀!  醫生開左藥, 好彩今次得三粒, 一粒姑娘幫我餵左, 兩粒之後兩日餵!

上一篇blog提到餵藥慘況, 有blog友介紹pill pocket, 仲教我邊度有得買, 老公專程去搵可惜店員話冇晒貨啦, 美國亦冇再出口, 佢推介左另一款:

呢款小食都幾易用, "筆"少少好似搓湯丸咁包住粒藥, 就可以當零食餵貓貓. 我驚包成粒藥味道太濃小肥貓會吐返出黎, 將藥丸掰開幾份包成幾粒:

我先餵一粒俾佢試下, 佢諗都冇諗就食左, 食完仲lam lam 脷好似唔夠喉咁款, 我馬上餵埋其餘果d, 佢都好快食完. 我同老公好興奮, 以為終於一天光晒!

到第二日餵最後一次藥, 我照舊搓左幾粒"湯丸", 諗住小肥貓又會好順攤食晒, 點知今次佢聞兩下就走, 我tum極佢都唔肯食, 痴d貓糧上去都唔吼!

最後我同老公決定用"粗暴法", 我地唔敢怠慢, 跟足video準備定大毛巾, 零食同藥丸! 先用零食引小肥貓上枱, 老公捉實佢我就包毛巾, 然後快快手咁餵! 謝天謝地成個過程都好順利, 係我餵完之後手震o者~

好簡單既餵藥工作, 唔知點解到我手上就變得好艱辛, 要同小肥貓鬥智鬥力, 試過得既方法原來又唔係次次得, 以為佢為食又傻更更好易呃原來有時又幾醒!

今次都要讚下老公先! 老公一直反對我將藥丸掰咁多份, 怕小肥貓食兩粒就唔肯食, 但我唔想藥味太濃佢食得辛苦, 仲駁咀話小肥貓實肯食添(第一次佢真係食晒丫嘛!) 後來要用"粗暴法", 我好後悔冇聽老公話呀, 望住掰到碎晒既藥丸, 簡直覺得係自作孽呢! 後尾只能死死地氣將碎藥丸重新組合, 搓成兩粒"湯丸", 辛苦小肥貓吞多一次囉~

出呢個blog既時候, 小肥貓已經食第三round藥啦, d蟲仲係未清晒, 好在今次只須餵藥水, 溝濕糧佢肯食咋!

唉~~ 點解梨形蟲咁難好架? 梨形蟲呀梨形蟲~~~ 拜託你唔好再纏住小肥貓啦!!!

餵藥傷感情

小肥貓食完藥已經一個星期啦!! 諗返餵藥果排真係好辛苦!

佢要食兩種藥, 藥丸每次半粒一日兩次, 藥水每次1.2ml亦係一日兩次. 佢肯食藥水溝濕糧(溝乾糧唔食), 對藥丸就十分抗拒, 磨粉溝濕糧落少少都ok, 落多d就唔肯食, 溝奶, 夾麵包都俾佢拆穿! 

我上過討論區搵資料, 又問過朋友意見, 都建議直接餵藥落口, 不過呢個係我最唔想用既方法, 太粗暴啦! 唔大力捉唔實隻肥貓, 大力又怕"鍊"鬼死佢! 我狼死佢亦唔弱, 反抗時抓到我滿手傷痕!  傷都算喇, 餵到唔緊要, 最弊卻唔一定餵得成! 餵完見佢搏命想嘔返粒藥出黎, 噴到成地口水個樣, 又會鄧佢辛苦, 覺得好心痛!

果幾日我同小肥貓關係非常差, 我為佢好餵佢食藥佢不但唔領情, 仲抓到我傷晒, 我真係有d嬲(雖然知道唔怪得佢). 有次佢餓得濟偷食麵包我仲好大力教訓佢添. 另一方面佢亦驚左我, 見我行近就縮, 我摸佢又會避! 後期我唔想再同佢衝突, 都係溝糧算數, 情願溝少d餵多幾餐, 唔使大家咁慘!

我響度諗, 如果有人提供專業寵物餵藥服務就好啦, 唔使自己煩. 同唔少朋友寧可花錢請補習老師, 都唔想自己教子女功課免傷和氣一樣!

食完一星期藥, 捱完一星期冇啖好食, 我同老公都覺得小肥貓瘦左, 有客人都係咁講, 但亦有客人話佢肥左喎, 究竟佢係肥左定瘦左呢?

食藥前:

食藥後:

企起身睇得清楚d:

小肥貓重5.5kg, 醫生話最好減少少喎~

仲有偷食麵包罪證:

三個包都俾佢咬過, 真係要教下佢table manners至得!